Manera ta conoci, pa algun tempo caba tin un situacion andando entre e trahadonan y gerencia di Arubus NV. Diabierna ultimo a tuma luga e accion di protesta mas recien di parti di e grupo di trahadonan, representa pa Sindicato SEPPA, unda nan a vocifera nan malcontento pa algun punto importante cu ainda no tin solucion.
Mirando e situacion aki, team di Bon Dia Aruba a acerca Minister di Transport, Ursell Arends diabierna y a puntra si e tabata na altura di e protesta aki, cu a tuma lugar a pesar cu a pidi e trahadornan pa pospone e protesta te cu despues di e reunion diamars cu tabatin riba agenda, y si e lo tuma accion prome cu e reunion diamars.
Reportero di Bon Dia Aruba a ricibi presupuesta for di Minister Arends ayera ariba e preguntanan aki unda el a remarca cu Arubus ta den un estado financiero critico hustamente pa motibo di metemento politico den e maneho diario.
El a splica cu e relacion laboral no ta entre Minister y trahadornan, pero e disputa ta entre e trahadornan y nan gerencia.
“E situacion a escala na nivel di accionista, manera mester ta. Y finalmente el a termina na mi despacho. Ami no ta autorisa ni pretende di tin poder pa dicidi e resultado den e tramitenan entre e trahadornan, gerencia y e compania priva cu ambos a bay di acuerdo cu nan lo scucha. E reunion na mi oficina ta hustamente pa tur hende comprende otro bon y comprende tambe cu ta existi un acuerdo caminda trahadornan a bisa di lo bay di acuerdo cu locual e compania priva trece dilanti,” el a indica.
Minister Arends a agrega cu el a pone tambe bon cla pa tur hende comprende, cu Gobierno di Aruba no ta bay sigui subsidia sin mas un compania cu aña tras aña ta hiba perdida enorme, cu ta pueblo mester paga p’e.
“Mi a bisa cu na 2024 e modelo comercial di Arubus mester cambia, pasobra si nos no haci esey, nos tur ta perde ‘saco y cangreu’,” el a finalisa.
