Durante e segundo edicion di ‘Foro Nacional pa Adulto Mayor’ dia 26 di maart 2024, a organisa varios sesionnan interactivo. Alrededor di 150 participantenan a bini hunto pa intercambia ideanan y conocemento riba esfuersonan actual pa atende cu e retonan y oportunidadnan di embehecimento.
E Foro Nacional pa Adulto Mayor ta un evento organisa door di Minister Ursell Arends hunto cu Directie Ouderenzaken pa explora solucionnan sostenibel y mantene lasonan bou di gruponan di interes di adulto mayor.
E evento a inicia cu presentacionnan duna door di stuurgroep y werkgroepen y e orador internacional Sr Ab Klink, ex minister di Salubridad, Bienestar y Deporte di Hulanda. Diferente recomendacion y sugerencia nan a wordo treci dilanti riba temanan di, entre otro, cuido na cas, financiamento di cuido y embehecimento activo. Despues di esaki, esnan presente a participa na sesion interactivo riba e temanan menciona pa sigui añadi ariba e plannan y pa honra e compromiso cu nos adultonan mayor.
Den e sesionnan interactivo a profundisa den discusionnan centra riba e reto y oportunidadnan. E dialogo aki a demostra e deseo sincero di e comunidad pa colabora cu otro y atende cu e necesidadnan di e adultonan mayor.
Temanan relevante manera bienestar fisico y nutricion a ser discuti, subrayando e importancia di conscientisacion y acceso na un dieta saludabel y pagabel. Ademas, con pa fortalece e conexionnan familiar y promove un estilo di bida mas activo y saludabel como esfuerson preventivo di malesa cronico pa adulto mayor como tambe pa esnan no 60+. Un otro tema discuti ta e sosten pa dunado di cuido informal, esta mantelzorgers, varios di cual ta un yiu of ruman cu ta cuida un miembro di nan famia na cas. Iniciativanan educativo y clarificacion di e opcionnan di sosten disponibel tabata puntonan treci dilanti. Financiamento di cuido tabata un otro topico discuti intensivamente, mirando e lista di espera na casnan di cuido pero tambe e costonan di cuido na cas.
E contribucionnan di e sesionnan interactivo lo wordo poni den un rapport y ser publica dia 18 di april 2024 riba publico.aw. E resultadonan clave lo forma e base pa e futuro desaroyo di maneho, garantisando cu cada adulto mayor na Aruba por gosa di un bida digno. E segundo edicion di Foro Nacional pa Adulto Mayor a reafirma e compromiso di Aruba pa crea un ambiente unda e adultonan mayor no solamente ta sobrevivi, pero ta florece y ta participa activamente den e bienestar di nan mes y di e comunidad. Minister Ursell Arends ta gradici tur cu e aporta na e discusionnan ineractivo cu nan tempo, conocemento y vision pa futuro.
