Ayera den oranan di atardi, minister di Integridad, Transporte, Naturalesa y Asuntonan di Adulto Mayor, Ursell Arends a duna un conferencia di prensa pa informa comunidad tocante e proyecto nobo, denomina Trash to Cash Aruba, cu a ser califica como un “promesa pa reduci y recicla desperdicio”.

Arends a expresa cu ayera tabata un dia importante y historico pa ministerio di Naturalesa, y cu maneho di desperdicio no ta algo desconoci den comunidad. El a trece dilanti e situacion di dump di Parkietenbos, cu na e mesun momento cu Arends tabata den conferencia di prensa, e dump tabata na candela.

El a enfatisa cu no ta trahadonan di Serlimar cu ta cende e candela. “E candela aki ta wordo cendi pero tin trahadonan di Serlimar cu ta riesga nan bida pa ora mester paga e candelanan aki”, Arends a comenta.

Di loke ta trata e proyecto nobo, Trash to Cash Aruba, el a bisa cu “esaki ta cuminsa cu un promesa, y e promesa aki ta bay den man hunto cu un deseo, e deseo di comunidad di Aruba ta pa nos por cera Parkietenbos” e mandatario a señala.

Esaki ta bay caminda comunidad ta bay reusa, recicla y reduci desperdicionan di Aruba, unda cu el a precisa cu “ta un deseo di nos generacion y pa nos futuro generacion, pa como isla por yega na un economia circular”.

Igualmente, el a comenta cu “esaki ta bay ta un promesa dificil pa cumpli, pero e ministerio di Naturalesa y di mi persona como minister lo haci todo por todo pa cumpli cu esaki”.

E prome paso di e proyecto Trash to Cash, manera Arends a splica, ta pa cera e dump di Parkietenbos. Y pa haci esey nan a identifica varios categoria di desperdicio cu lo por wordo re-dirigi pafo di e dump y por wordo procesa di un manera diferente y alternativo.

E prome fase ta e parti di conscientisacion di comunidad pa stimula e ‘mind shift’, e cambio di mentalidad. E fase dos ta e participacion di comunidad y sector comercial pa converti desperdicio den placa. Y di tres fase ta pa hancra e compromiso di gobierno pa sostene, facilita y trece regulacionnan pa normanan di operacion y manera Arends a sigura, pa forma entre otro leynan y maneho con ta bay atende cu desperdicio.

El a anuncia cu den proximo dianan comunidad lo cuminsa mira varios video di ehemplo di compania y iniciativanan cu tin caba den sector priva pa loke ta trata maneho di desperdicio. Aki Trash to Cash Aruba – segun Arends a bisa – lo duna e oportunidad pa sigui ilustra kico tur ta pasando caba den comunidad.

Ademas, el a anuncia un Pitch Event cu lo tuma luga dia 22 di maart, durante cual ta bay duna oportunidad na e companianan cu ta bezig caba cu maneho di desperdicio pa ‘take ownership’ di un total di 10 pa 14 waste stream cu ainda ta termina na Parkietenbos. Tambe pa brinda oportunidad na e hobennan entrepreneur cu kisas tin un idea innovativo y creativo pa wak con pa yega na un solucion, y asina ey evita pa mas desperdicio lo sigui yega na Parkietenbos, pa por crea un otro balor economico, “un business model” manera Arends a sigura.

Den e Pitch Event lo tin un panel durante cual ta bay analisa cada un di business plan aki, unda cu lo tin participacion tambe di sector financiero cu lo yuda brinda y facilita e oportunidadnan aki pa nan por bira negoshi.

Den e conferencia di prensa aki, reportero di Bon Dia Aruba a haci varios pregunta na Arends. E prome tabata kico minister Arends tin como plan pa sanea e dump di Parkietenbos? Pa cu esaki el a contesta: “E plannan ta mesun plan cu mi a elabora tambe cu secretario di Estado, Alexandra Van Huffelen ora nos a haya e chens pa dirigi nos mes na su persona den ministerraad. E plan ta pa cap Parkietenbos, cera esaki, redirigi desperdicionan cu ta yega eynan pa paga e candela y converti esaki den un solar energy park. Esey ta e plan y esey ta loke nos kier logra den corto tempo.”

Ademas, a puntra ki garantia e ciudadanonan tin cu esaki lo sucede na un manera responsabel, sin causa mas daño na salud y medio ambiente? Arends su contesta tabata cu “e problema ta conoci pa tur hende. Nos sa cuanto ta costa of nos tin un idea di cuanto ta costa. Nos tur sa e situacion financiero di Land Aruba y esey ta e combersacion cu nos a hiba tambe, cu nos mester di aprobacion na final di dia di Hulanda pa por tin un deficit un tiki mas halto pa nos por logra haci esaki. Pero e obhetivo ta pa logra esaki e aña aki y tin trabaonan andando pa wak con nos ta haya financiamento pa cera esaki.”

Tambe, Arends a referi na Sra. Anouk Balentina, kende ta e persona cu ta treciendo un lucha for di basta aña caba pa loke ta trata e problema di Parkietenbos y su efectonan riba comunidad y medio ambiente. E mandatario a señala cu “nos tin te fin di aña aki pa bin cu un solucion y ta loke nos ta determina tambe, prome cu fin di aña”.

Di mesun manera a puntra ken ta esun cu ta responsabel di e proyecto aki. Arends a expresa cu “esaki ta un prioridad pa full mi ministerio. Mi tin e personanan indica cu ta trek esaki y mi tin mi beleid adviseur pa loke ta trata naturalesa cu ta atendiendo cu esaki”, el a declara.

E proyecto no ta cay bao Serlimar segun el a expresa, e ta cay bao su bureau cu ta esun cu ta atendiendo cu esaki.

Tocante ken ta bay cobra ciudadanonan pa e proyectonan aki, Arends a informa cu pa cera Parkietenbos “esey no lo ta tarea di Serlimar. Serlimar tin su tareanan caba cu ta recogemento di sushi y procesamento na e momentonan aki. Pero un bes nos identifica mas partner den comunidad cu ta dispuesto pa take ownership di varios di fluho di desperdicio (‘waste streams’), como por ehemplo tairanan, pa stop di yega na Parkietenbos, nos tin un compania cu ta bisa nos ‘a mi tin e solucion pa esaki unda ta bay crea azeta of otro cos cu e taira y e no lo end up na Parkietenbos’, e ora ey e tarea aki ta bira di un compania priva cu lo procesa taira y lo converti esey den un oportunidad cu un balor economico pa su compania.”

Durante e Pitch Event e companianan lo bay mustra cual ta nan intencion y cual ta nan business plan. “E ora ey nos lo crea un waste policy pa identifica ken ta bay take ownership di cada un di e waste streams aki” manera Arends a expresa.

Esaki lo wordo adopta na normanan internacional unda nan ta trahando riba esey, riba leynan y tambe riba e maneho di desperdicio, “esaki ta algo cu tin full nos atencion y mi tin expertonan den cas cu a yega di haci esaki den pasado pa logra esaki pa Aruba”, el a finalisa.

Potret di Parkietenbos cendi na candela e dia di ayera ta cortesia di Jan Jaap.