Den fin di siman, ariba rednan social por a tuma nota di un publicacion cu ta mustra Minister di Transport, Integridad, Naturalesa y Asuntonan di Adulto Mayor den un situacion incomodo, na unda e tabata subiendo su auto despues di a bebe algun bebida alcoholico y cu cerbes den man.
Esaki a causa un reaccion den comunidad, na unda hopi a sali pa dilanti pa critica e minister pa su acto, indicando cu como figura publico e mester ta un ehempel pa demas cuidadonan.
Algun reaccion tabata inclui: “Berguensa, un minister cu ta stuur bao influencia. Ki ehempel e ta duna nos hobennan” ; “Ley ta conta pe tambe?” y “Como Minister di Integridad esey no ta algo hopi integro. Hopi decepcionante pa wak esaki minister.”
Otronan, aunke no ta di acuerdo cu loke e minister a haci, a sali pa dilanti y defende e minister den cierto manera, señalando cu e tambe ta un ser humano, e tambe ta hende y manera hopi despues di un dia largo di trabao ta “dal dos” pa relax y enjoy.
Mirando tur e reaccionnan cu tabatin, Minister Arends a publica un disculpa publico ariba su pagina di Facebook oficial.
E disculpa ta bisa lo siguiente:
“Den fin di siman, despues di e actividad di Baki den Bario y despues di a cana den e Mangelnan di Santo Largo, Mangel Halto y Spaans Lagoen, mi a scoge pa bay refresca cu otronan cu tambe a traha oranan largo den higra di solo.
Na salida, den un momento di descuido, mi a subi auto cu e boter di cerbes den man. Pa cu esaki, mi kier a pidi mi mas sincero disculpa. Mi ta sigura cu na ningun momento a trata di buracheria den dia cla, mucho menos un paranda.
Mi ta desea di sigura tambe na un y tur cu mi ta comprometi pa siña di e incidente aki.
Den e temporada di Carnaval cu nos ta aden mi ta probecha di tur e atencion cu e situacion a genera pa pidi nos comunidad cuida otro y yuda otronan tambe evita momentonan di descuido.”
Ariba e publicacion aki hopi usuario a reacciona comentando cu nan ta gradici e minister pa acepta su eror y pidi disculpa publicamente pa e sucedido.
