Recientemente minister di Transporte, Integridad, Naturalesa y Asuntonan di Adulto Mayor demisionario, Ursell Arends, a anuncia cu a entrega e prome 20 permiso di taxi adicional, cu tur a bay pa hulpchauffeurs, segun cumplimento di rekisitonan necesario pa por ricibi un permiso di taxi.

Mediante un comunicado di prensa a mandatario a splica cu e prome 20 permisonan di taxi aki ta cay bou di un proceso mas structura y transparente. El a indica cu for di comienso, su compromiso tabata pa sigura cu e reparticion di permisonan di taxi ta basa riba oportunidad igual pa tur ciudadano.

El a sigui splica cu den 2023, a cuminsa cu e inventarisacion di e aplicacionnan anterior. Durante e inventarisacion aki a sali na cla a bin cu tin persona cu tin hasta 20 aña ta warda pa ricibi un contesta riba nan peticion pa permiso di taxi. Esaki a haci cu e mandatario a ehecuta un cambio den maneho di permiso di taxi, cu cual a introduci structura pa un sistema mas transparente por ser implementa.

Den un esfuerso pa ta transparente pa loke ta trata otorgamento di permiso di taxi, minister Arends a indica cu e lista completo di personanan cu ta den programa pa ricibi permiso di taxi, categorisa segun zaaknummer, ta disponibel publicamente riba e pagina Publico.aw.

Manera ya caba a ser indica, e prome 20 permiso a ser otorga segun e principio di FIFO (First-In-First-Out), cual ta basa riba e fecha di aplicacion di e persona pa un permiso di taxi.

E mandatario a splica cu den e proceso Departamento di Transporte Publico (DTP) ta contacta e aplicante pa nan entrega nan documentonan pa verificacion. Den e fase inicial aki, tur 20 persona cu a ricibi permiso ta hulpchauffeurs actual cu ta cumpli cu tur rekisito necesario pa por ricibi un permiso di taxi.

El a indica cu e cantidad extra di taxi ta basa riba un estudio di capacidad di carga cu a ser realisa den cual a tene na cuenta cu e aumento di cantidad di cambernan di hotel extra na Aruba, cual na su turno ta aumenta e cantidad di turista na Aruba. E resultado di e aumento aki ya caba por ser observa na con largo turista tin cu warda na aeropuerto pa por ricibi servicio di taxi.

Relaciona cu e anuncio di aumento di cantidad di taxi, ya caba na final di januari e organisacion Union di Taxi ta Nos a expresa cu nan no ta di acuerdo cu e decision aki y a manda un carta pa presidente di Parlamento di Aruba, Gerlien Croes, pa atende cu nan preocupacion.

Segun un reportahe di e noticiero Aruba.nu, Union di Taxi ta Nos (UTN), hunto cu otro organisacionnan di taxi na Aruba, a pidi un consulta urgente cu parlamento. E sindicato di taxi a reacciona riba e anuncio di minister Arends pa aumenta e cantidad di permiso di taxi y a manda un carta pa presidente di parlamento, data dialuna 20 di januari 2025, den cual e sindicato a expresa su preocupacion riba e impacto di e plannan aki riba e sector.

Segun e noticiero, presidente di UTN Rodney Besselink, a enfatisa cu e organisacion no ta contra di crecemento di e sector di transporte, pero na mesun momento a indica cu cualkier decision cu ser tuma pa expande e sector mester ta precedi pa un evaluacion detaya. Segun e UTN, ta crucial pa determina si di berdad tin mester di mas taxi riba e isla prome cu tuma tipo di decisionnan asina. E sindicato a adverti cu sin un plan bon pensa, permisonan adicional por tin consecuencianan negativo tanto pa economia como taxistanan.

Den e carta dirigi na e presidente di parlamento, UTN ta pidi atencion special na e posicion di asistente di chauffeur, cu ta depende completamente di nan trabou den e industria di taxi. E sindicato ta kere cu e chauffeurnan aki mester tin acceso directo na rijbewijs di taxi, ya cu nan ta un parti esencial di e sector.

Den e carta tambe e sindicato ta critica e hecho cu den pasado decisionnan relaciona cu permiso di taxi hopi biaha a ser tuma unilateralmente door di diferente minister di Transporte, specialmente durante añanan di eleccion.

E sindicato ta defende nan punto cu e decisionnan aki no mester ser influencia pa interesnan politico, pero mester ta basa riba un evaluacion obhetivo di e necesidadnan di e pais.

UTN ta enfatisa cu aunke en berdad Aruba ta conociendo un crecemento economico, nan a constata cu hopi taxista mester warda pa oranan largo pa por haya pasahero, hasta na luganan druk manera aeropuerto y hotelnan. E sindicato a remarca cu a pesar cu desaroyonan nobo di hotel, manera apertura di dos hotel nobo, por aumenta e demanda pa taxista, nan ta sostene nan punto di bista cu esaki no necesariamente ta hustifica un aumento inmediato den e cantidad di taxi.

Un aspecto cu ainda no a ser regla ta e lista di prijs pa taxistanan, y implementacion di taxi meter. Den un conferencia di prensa den luna di september ultimo, minister Arends a splica cu e landsverordening personenvervoer no ta papia di un lista di prijs, pero ta papia di un taxi meter.

Pa esaki, el a sigui splica, un compania a duna un presentacion na tur representante di taxista, kico ta e opcion cu tin cu por persigui hunto como gobierno demisionario y den cooperacion cu e taxistanan pa introduci un aplicacion y taxi meter.

Minister Arenda a remarca cu e compania aki ta un di e posibilidadnan pa duna e servicio aki pasobra no por bisa cu seguridad cu e compania aki ta esun cu ta bay provee e aplicacion y taxi meter pasobra mester tene cuenta cu mester pasa den un proceso di destaho publico pa por yega na e compania cu ta bay brinda gobierno e servicio aki.

Pero mientras cu ta finalisa e proceso pa un compania, aplicacion y taxi meter, minister Arends a bin cu un proposicion pa fiha un lista di prijs den un fase transitorio y un bes cu e lista di prijs aki ta vigente ta fiha un fecha caminda lo bin cu un aplicacion cu ta conta pa tur e servicionan, no solamente pa taxi pero tambe pa T y O y di e forma aki ta garantisa seguridad, pero tambe informacion, un sistema husto na tur e usuarionan cu ta haci uso di e servicionan aki.