Ayera mainta durante un conferencia di prensa, minister di Transporte, Integridad, Naturalesa y Asuntonan di Adulto Mayor, Ursell Arends a elabora ariba e cambionan cu a drenta na vigor pa watersportbeleid.

Minister Arends a splica cu dia 28 di mei ultimo, Conseho di Minister a aproba e maneho temporal pa watersport vergunning, conoci como articulo 18, cual a drenta na vigor desde dia 1 di juni 2024.

E maneho temporal aki a ser stipula a base di consehonan di directie scheepvaart, recomendacionnan di beach policy commissie, cu participacion di DIP, DOW, Warda Costa, Polis Maritimo, ATA y AHATA.

E mandatario a indica cu tur e partnernan ta di acuerdo cu e ley aki tabatin mester un revision completo y a bin cu cambionan den e maneho di actividad acuatico segun articulo 18 y 21 di e Ordenansa Nacional cu ta regarda e awanan y lama publico.

Minister Arends a remarca cu pa varios aña caba tin basta keho registra pa loke ta trata e ‘hot zone’ di actividadnan acuatico, na unda cu a yega na un situacion cu no por garantisa seguridad mas. Den e ultimo añanan tabatin incidentenan cu resultado- y consecuencianan devastador cual a pone Aruba den un situacion internacional delicado.

Despues di e incidente lamentable na unda un hobencita turista a perde su bida den lama despues di sufri un accidente, esaki a pone den cuestionamento e norma- y standardnan den cual operadornan di watersport ta eherce e actividadnan acuatico actualmente.

“Pa mantene Aruba su reputacion y garantisa seguridad di tur cu ta disfruta di lama, reevaluacion di e maneho tabata necesario,” el a resalta.

E mandatario a splica cu na april di 2022 a pone un paro temporal riba e peticion pa permisonan di watersport y a haci un investigacion riba e situacion actual. Tanto den aspecto di medio ambiente, como den aspecto di seguridad, ademas di e estudio ariba capacidad di carga, sostenibilidad y durabilidad di e sector.

Mirando cu esaki ta tuma hopi tempo y no ta intencion di gobierno pa perhudica e companianan existente, el a resalta, nan a tuma decision pa introduci un maneho temporal mientras ta finalisa e estudio di sostenibilidad y durabilidad di e sector aki.

“Despues di hopi reunion, discusion y conseho, e maneho nobo ta toca permiso di un compania cu ta ofrece actividadnan di e deporte acuatico. E cambionan den e watersportbeleid ta esfuersonan colaborativo di e vision di gobierno hunto cu Directie Scheepvaart, DIP, DOW, KPA, Warda Costa, ATA y AHATA y otro srakeholders responsabel pa informa y percura cu cumplimento di regulacionnan aki,” el a indica.

Pa loke ta e cambionan, minister Arends a splica cu a dicidi riba lo siguiente regardando na peticion pa permisonan nobo of reemplaso di boto y/of expansion di un permiso pa transporta pasaheronan contra pago of pone disponibel a cambio di pago segun articulo 18 di e Landsbesluit Openbare Wateren en Stranden.

E mandatario a sigui splica cu e watersportbeleid ta enfoca riba tres area principal; reemplaso, expansion y seguridad.

Pa loke ta trata e tema di reemplaso, el a informa cu tur peticion pa permiso nobo ta wordo suspendi te cu proximo aviso mientras nan ta warda e investigacion necesario den e sector maritimo keda cla.

Peticionnan cu a wordo entrega prome cu dia 1 di januari 2024 pa reemplasa un boto lo wordo procesa debidamente. El a agrega cu si un compania ta desea di reemplasa un boto pa un otro similar den caracteristica, Directie Scheepvaart lo realisa un inventarisacion necesario y despues lo traha riba e ahustenan administrativo necesario di acuerdo cu e procedemento y regulacionnan vigente.

Pa loke ta trata e parti di expansion, el a indica cu formanan di expansion ta inclui e extension di actvidadnan acuatico, e aumento di cuanto boto ta dispone di dje of expansion di area cu e compania ta opera of desea di opera den dje.

El a splica cu peticionnan pa expansion entrega prome cu 1 di januari 2024 lo ser procesa debidamente. Companianan cu tin intencion pa exclusivamente ofrece excursion di boto pa snorkel, dive of tripnan di piscamento por cualifica pa ampliacion di nan permiso agregando un boto na su operacion, mientras cu nan ta cumpli cu tur e rekisitonan legal.

Minister Arends a resalta cu un compania por amplia su permiso agregando maximo di un boto adicional. Ademas di esaki, e persona cual su nomber ta aparece ariba e permiso mester obtene tur biaha cu e opera e boto un ‘liability insurance’ di acuerdo cu articulo 19 di e Landsbesluit Openbare Wateren en Stranden. E seguro aki, el a indica, ta wordo exigi pa e wordo entrega tambe na Directie Scheepvaart den tur caso.

Pa loke ta trata e parti di seguridad, e mandatario a splica cu desde 1 di januari 2025 tur boto comercial pa actividadnan acuatico mester ta ekipa cu un propeller guard. El a agrega cu pa actividadnan acuatico unda ta inclui transportacion di pasahero riba lama door di un boto, mester tambe tin un segundo persona di e compania di watersport presente riba e boto pa e rasonnan di seguridad.

E persona aki lo ta conoci como e observador, co-piloto of spotter ta supervisa e participantenan di e actividad acuatico y ta maneha e comunicacion entre e participantenan y e piloto usando señalnan manual.

Minister Arends a añadi cu otro aspecto importante pa loke ta trata sostenibilidad den e parti di seguridad adicional ta indica cu ta prohibi di mara un boto of otro obheto cu un of sin boei na e paradanan di botonan cu a sink. No mag di mara mas na esakinan pasobra pa motibo di esaki, el a señala, dañonan a wordo causa na entre otro e conocido parada di Antilla pa motibo cu continuamente tabata mara boto na esaki. Tampoco ta permiti pa mara na coralnan of cu boei cu ta marca den e zonanan unda personanan ta landa.

“E cambionan aki ta esencial pa garantisa e seguridad y sostenibilidad di actividadnan acuatico na Aruba. Nos ta kere cu e cambionan aki lo mehora e experiencia tanto pa e residente pero tambe pa e turistanan manteniendo e standardnan halto di seguridad y proteccion ambiental,” e mandatario a subraya.