Minister Tjon ta firma MOU cu JZP, OC, Directie Voogdijraad, KIA y Family Justice Center

Ayera mainta, durante un rueda di prensa, Minister di Husticia y Asuntonan Social, Rocco Tjon a firma un MOU conhuntamente cu Jeugd en Zedenpolitie (JZP), Family Justice Center y tres psicologo cu ta traha na Orthopedagogisch Centrum (OC), Directie Voogdijraad y KIA. E MOU aki tin como meta garantisa e cuido y guia pa e victima y na mesun momento percura pa un calidad halto di investigacion.

Daphny Tecklenborg, Project Leider di Family Justice Center a splica cu e colaboracion aki lo consisti di tres diferente nivel. E prome nivel ta pa ora cu un menor mester pasa den un interogacion, cu nan lo wordo prepara pa esaki. El a specifica cu esaki no ta riba e parti di e contexto di e caso, pero mas bien riba e proceso di e caso, kico e menor lo por spera durante un proceso di un interogacion.

E segundo nivel ta pa hunto, JZP y e tres psicologonan, duna asistencia na otro caminda cu ora cu nan encontra casonan dificil. Por ehempel na momento cu e personal di JZP of ora e psicologo haya encontra cu un caso dificil, nan lo por intercambia pensamento y sostene otro den e parti aki. “Esaki ta algo hopi importante y tambe nan lo bin e ora ey sigur mensualmente hunto y asina e samenwerking por crece mas”, Tecklenborg a indica.

E tercer y ultimo nivel ta pa duna asistencia. E tres psicologonan aki lo yuda JZP duna asistencia riba casonan compleho. Tecklenborg a menciona por ehempel casonan na unda e edad di e menor ta hopi abao of cu e actitud di e menor ta hopi compleho cu mester di tips pa con JZP lo por lidia cu e menor mientras cu ta den e combersacionnan cu e menor aki.

“Dus riba tres diferente area e tres psicologonan aki lo bay sostene JZP den nan tarea cu ta uno sumamente dificil pasobra ta trata cu menor. E tres psicologonan aki ta bini for di Directie Voogdijraad, Orhtopedagogische Centrum como tambe KIA”, Tecklenborg a remarca.

Minister Tjon a subraya e importancia di e MOU aki y e importancia di uni e Ministerionan di Husticia y Asuntonan Social pasobra tin profesionalnan di e parti hudicial como tambe profesionalnan di e parti social cu ta bini hunto pa ataca un problema grandi cu Aruba ta wordo confronta cune.

“Mi ta contento pa diferente motibo awe. Algun luna atras nos a scoge specificamente pa e opleiding studieoverhoor no ta pa zeden rechercheur so, nos a scoge specificamente tambe pa trek profesionalnan di otro instancianan acerca pasobra di e manera ey bo por percura cu dos aspecto den cuadro di esaki ta haya hopi importancia”, el a expresa.

E dos aspectonan importante aki, Minister Tjons remarca, ta e e parti di cuido, e parti emocional pa e victimanan na unda cu e psicologonan lo tin un rol hopi importante den esaki, den e preparacion prome cu un mucha mester wordo interoga, pero tambe e calidad di e investigacion cu ta wordo haci pa e caso.

Ministerio Publico tambe tabata presente durante e firmamento y Minister Tjon a enfatisa nan tarea y rol cu tambe ta wordo hancra den e diferente palabracionnan cu a wordo firma. El a splica di e forma ey nan por percura cu e menor cu ya caba a pasa den un evento traumatico ta haya e guia y e ayudo durante interogacion y despues door di psicologonan, pero na mesun momento tambe ta percura cu ora Ministerio Publico mester presenta un caso dilanti di hues, ta percura pa e calidad di investigacion wordo salvaguardia tambe.

Banda di esey, el a sigui splica, ta hopi importante pasobra hopi biaha nan ta scoge pa inverti un biaha so den un opleiding y despues di cinco of seis aña e calidad a cambia, pero di e forma aki Family Justice Center su rol ta pa constantemente keda enfoca ariba e parti di educacion, curso y tayernan.

“A base di palabracionnan cu tin haci aworaki den e parti di intervencion, mi ta kere ta hopi importante cu un bes pa luna tur e profesionalnan aki ta bin hunto y asina bo ta garantisa tambe cu e calidad y e desaroyo cu tin riba e tereno aki keda wordo teni cuenta cune tambe den e trabounan cu ta wordo haci”, el a agrega.

Eric Barry, Chef Jeugd en Zedenpolitie, a expresa cu como hefe di JZP e ta hopi contento cu e cooperacion aki y el a remarca cu e ta kere den cooperacion den hopi ramo pasobra den e departamento di JZP nan ta deal cu hopi partnernan interno y externo pasobra nan ta trata cu mucha.

El a enfatisa cu nan preocupacion ta semper e cuido pa e mucha. “Nos ta deal cu e investigacion pero e cuido ta hopi importante pa nos y p’esey mester tin un parti social pa yuda nos den e departamento aki. Mi ta hopi orguyoso tambe cu mi team cu a sinta cu mi y bay di acuerdo cu nos mester haci e esfuerso pa logra esaki”, el a enfatisa.

Aisca Berkemeyer, directora di Directie Voogdijraad, tambe a indica cu nan ta hopi contento cu e trayecto aki, vooral pa e aspecto social caminda cu hopi biaha e menornan ta wardando pa un trayectoria tuma luga. El a remarca cu e parti di interogacion ta tuma su tempo berdad, pero pa e menor parti emocional pa deal cu esaki durante di e trayecto, ta fastioso cu tabata tuma su tempo pa falta di personal cualifica.

“Nos ta hopi agradecido cu a brinda e oportunidad pa un base amplio sigui e training aki y cu nos menornan ta haya e atencion mas diligente y cu asina cu nan caba cu e parti strafrechetelijk cu di biaha nan por cuminsa cu e parti di cuido y restauracion di loke nan por a pasa aden durante e tayectoria aki”, el a expresa.

Berkemeyer a agrega tambe cu nan ta hopi agradecido tambe na e psicologonan cu di nan tempo ta hopi dispuesto pa haci esaki y cu nan ta kere den e colaboracion di tur e departamentonan como partido. “E ta un trayecto di traha riba confiansa entre otro y esun cu mas lo bay gosa di esaki ta e menornan y nan famia cu ta pasa den un trayectoria hopi traumatico. Di nos banda danki pa esaki y nos lo keda duna nos parti di contribucion den esaki”.

Johnny Boekhoudt, psicologo forense na Orthopedische Centrum den nomber di e psicologonan cu a firma e MOU a indica cu e ta hopi orguyoso cu e cooperacion aki. “Nos sa con dificil e trabou di polis ta, nos a sigui un training intensivo cu nan y nos a ripara tambe cu locual nan ta haci ora nos papia di interoga hobennan of muchanan jong, con dificil esey ta y con profesional bo mester ta pa hacie pasobra e importante ta cu bo ta haya e berdad, pero e berdad no por bay na costo di e salud mental di e hoben”, el a indica.