Den edicion anterior di Bon Dia Aruba, a elabora ariba algun di e puntonan cu Minister di Husticia, Rocco Tjon, a reacciona riba dje den su carta dirigi na e presidente di Sindicato di Polis Aruba (SPA) Sr. Rodney Solognier fecha 22 di januari 2023. SPA a publica un comunicado “Declaracion cu ta recortando den presupuesto di KPA ta incorecto”di prensa caminda ta vocifera nan malcontento ariba diferente punto y ta pidi atencion di Minister pa soluciona esakinan.

E prome puntonan cu Minister Tjon a elabora riba dje den su carta tabata entre otro e situacion di schimmel na Warda di Polis Oranjestad y San Nicolaas, e pago di vakantieuitkering di e trahadonan y politica di enfermedad.

Pa loke ta e punto di NCTVI, e Minister di Husticia ta sigura cu den e comunicado tin suposicionnan incorecto pasobra ta desconoce e informacion corecto. E ta splica cu e NCTVI tin su propio presupuesto for di momento cu el a wordo estableci na 2018. E costo di e personal di NCTVI, incluyendo e personal ehecutivo, ta sali for di e presupuesto di NCTVI y no for di e presupuesto di KPA.

Tjon ta sigui splica cu NCTVI a keda estableci pa e Decreto di Establecimento di 8 di augustus 2018 cu ta hancra e organisacion den e sistema di gobierno y e decreto aki a wordo firma pa su excelencia Gobernador di Aruba y ex-Minister di Husticia, Andin Bikker.

Den su carta Minister Tjon ta remarca cu e decreto di NCTVI ta establece tambe e tareanan principal di cada servicio gubernamental y esaki ta aplica pa NCTVI tambe.

“E personal ehecutivo di NCTVI ta autorisa solamente pa realisa e tareanan aki y e tareanan aki ta wordo realisa bao e autoridad di PG. Conforme cu e articulonan 1 y 2 di e Ordenansa Nacional di Polis, tanto e agentenan policial como e agentenan special di polis ta encarga cu e desempeño di funcionnan publico,” Minister Tjon ta indica den su carta.

El a ratifica cu e tareanan operativo ta wordo realisa pa e personal ehecutivo cu a wordo capacita pa e proposito aki y e tareanan politico pa personal cu a wordo forma academicamente na nivel universitario pa cumpli cu e debernan aki.

El a agrega tambe cu e hecho cu INTERPOL no ta parti di KPA no ta algo nobo. Na Aruba INTERPOL a pasa over na depende di DOOV bao direccion di e difunto Roland Peterson.

Pa loke ta trata, den e punto di presupuesto di KPA, e declaracion haci pa sindicato SPA den cual ta indica cu ta recortando den e presupuesto di KPA, Minister Tjon ta sigura cu esaki ta incorecto.

El a splica cu un di e desafionan mas grandi pa loke ta KPA tabata y ta ainda e gestion operativo. El a subraya cu na momento cu el a asumi e cargo di Minister di Husticia, el a enfrenta e hecho cu KPA no tabata haci uso di tur su recursonan cu nan tabatin disponibel den nan presupuesto anualmente: “Esaki ta e motibo pakico for di mi Ministerio nos ta organisa consultanan regularmente cu e departamento di KPA cu e meta di promove e proceso aki cu ta beneficia e coleganan di KPA,” el a señala.

El a menciona cu den aña 2021, KPA a usa 15.592.639 miyon florin y na aña 2022, te cu december 5 2022, el a haci uso di 15.953.622 miyon florin, di acuerdo cu cifranan oficial. Pa aña 2023, Minister Tjon a enfatisa cu como Minister di Husticia el a presiona pa haya mas recurso pa KPA y den presupuesto di 2023 tin un monto di 19.486.500 miyon florin disponibel pa KPA, locual ta nifica un aumento significativo pa e departamento aki.

Siguiente punto cu Minister Tjon a elabora riba dje ta computer den vehiculonan policial. El a indica cu for di cuminsamento di 2022 su ministerio ta sinta na mesa cu KPA, Stichting Beheer ICT Rechtshandhave y tur e stakeholdernan involucra, incluyendo e companianan di seguro, DIMP y DTI relaciona cu e proyecto di Mobile Data Terminal.

El a señala cu e laptopnan necesario cu ta forma parti di e proyecto aki a wordo entrega caba na KPA compaña pa e braketnan necesario pa cuminsa cu e proyecto piloto: “Tanto e actornan involucra como mi ministerio ta cla pa algun tempo caba pa lansa e proyecto piloto.”

El a remarca cu ta juist na peticion di KPA e proyecto aki ta temporalmente suspendi y su oficina ta en espera ainda ariba e plan di accion di KPA pa implementa e proyecto piloto definitivamente. El a conseha e presidente di e sindicato, “consulta cu KPA internamente prome cu comparti informacion incorecto y echonan distorciona externamente.”

Pa loke ta e telefonnan cu e sindicato ta menciona den nan comunicado, e minister a indica cu esakinan no ta forma parti di e proyecto aki.

E prome fase di e proyecto Mobile Data Terminal ta un fase di prueba y despues di e analisis di e fase aki, lo implementa esaki den e vehiculonan di vigilancia nobo. Aworaki KPA ta den e fase di prueba di e vehiculonan di vigilancia nobo y asina cu e fase aki termina, tur e vehiculonan lo ta ekipa cu e MDT (Mobile Data Terminal). Asina tur e vehiculonan lo tin acceso na ActPol y lo ta vincula tambe na DIMP, DTI y tur compania di seguro.

Por ultimo, Minister Tjon ta referi na e punto di vehiculonan di vigilancia y accident cu SPA a trece pa dilanti. El a splica cu manera SPA ta na altura caba, KPA a crea un comision cu ta encarga cu e destaho publico di e vehiculonan di vigilancia. E destaho lo cuminsa solamente despues cu e comision aki duna nan conseho y e comision scoge ki vehiculonan nan kier cumpra.

El a informa, relaciona cu e vehiculo involucra den accident, cu manera SPA ta na altura di dje, KPA ta huur vehiculonan for di diferente companianan di huur auto casi semanalmente sin duna participacion na ministerio ariba e tema aki.

E minister a enfatisa cu su Ministerio no tin ningun papel den esaki y no ta desea di tin ningun papel tampoco pa loke ta tema aki, ya cu e ta cay completamente bao KPA y manera a keda indica anteriormente, tin suficiente recurso disponibel pa KPA pa e tipo di temanan aki.

“P’esey afirmacionnan of suposicionnan cu e vehiculo no tabata adecua debi na e falta di recurso no tin sentido,” el a subraya.

El a agrega cu na e momentonan aki, na pedido di dje mes, un solicitud cu el a bolbe ripiti durante e reunion triangular di 16 di januari 2022 cu fiscal y korpschef, tin un investigacion interno di e proceso di eleccion di e vehiculo aki specificamente, pero ainda e ta en espera di e resultadonan.

Finalisando su carta di reaccion, Minister Tjon ta sigura na e presidente di e sindicato cu tur e informacion exponi den su carta ta respalda pa tur e documentonan di politica, contractnan, ley- y reglamentonan, decisionnan institucional y acuerdonan di diferente consulta cu a wordo realisa tocante e puntonan menciona den e carta.