Diamars den Parlamento di Aruba a tuma reunion publico relaciona cu e tiroteo fatal di polis cu a cobra bida di e hoben di 19 aña A. Lanoy. Durante reunion minister di Husticia demisionario, Rocco Tjon, como esun responsabel y encarga cu cartera di husticia, a contesta preguntanan di parlamentario pa loke ta e suceso lamentabel aki.
Primeramente e mandatario a remarca cu tur persona tin e mesun meta, cual ta pa haya kico realmente a pasa. El a reitera cu como minister di Husticia e no por specula y lo contesta preguntanan a base di hechonan y a base di informacion concreto.
Diferente parlamentario a referi na e tiroteo como un caso lamentabel, hororoso, entre otro, y alabes tambe a indica cu aworaki ta biba un miedo, rabia y hasta duda den pueblo pa loke ta trata Cuerpo Policial, cual e mandatario a sigura e ta compronde, pero a subraya cu mester enfoca riba e meta cu ta pa un investigacion por ser conduci y pa esaki no ser contamina, pa consecuentemente por presenta e hayazgonan sea dilanti un hues of un comision, y si tin recomendacion cu mester ser implementa, pa esakinan ser implementa.
Un di e preguntanan cu diferente parlamentario tabatin, y cu tambe pueblo mes ta puntra su mes, ta con por sigura cu tin transparencia den investigacion. Minister Tjon a splica cu hustamente door cu e investigacion ta ser conduci, segun e criteria di implementacion, pa landsrecherche cu ta un organo independiente, por sigura esaki. Ademas el a agrega cu Cuerpo Policial no ta envolvi den e investigacion y ta ser conduci bou di mando di Ministerio Publico.
Preguntanan tocante ‘body cams’ tambe a bin dilanti, na cual e mandatario a contesta cu e proyecto di ‘body cams’, cu ta mara na e proyecto di camaranan di seguridad, ta den e fase piloto, y ya caba tin miembronan di Cuerpo Policial di Aruba cu ta haci uso di esaki y e hayazgonan lo ser evalua pa wak despues con esaki lo ser ehecuta den full KPA.
Na mesun momento minister Tjon a recorda e caso lamentabel cu a tuma luga basta aña pasa caminda un agente di polis a perde su bida y tabatin e body cam. El a indica cu no por tin e pensamento cu e ‘body cam’ ta e solucion pa tur cos.
Varios parlamentario a dirigi pregunta na e minister di Husticia relaciona cu testnan psicologico y cuido di salud mental di agentenan policial. El a splica cu e aspecto aki ta haya su debido atencion den KPA. El a sigui splica cu tur gerente ta haya esaki den cuadro di e cuido di persona y ta tuma luga caba. El a remarca cu un agente policial cu tin mester di ayudo aki, na momento cu e indica esaki den combersacion cu su lider e ayudo aki ta ser brinda.
El a agrega cu banda di esaki ya for di aña pasa tin un proyecto cu a ser aproba, cu ta forma parti di e programa pa loke ta trata salud mental pa Cuerpo Policial en general. E programa di salud mental aki ta encera ehercicionan, training y combersacion cu e miembronan di KPA y obviamente e ayudo y cuido ta ser brinda na tur cu tin mester di esaki.
Minister Tjon a splica, clarificando informacion cu parlamentario Otmar Oduber a trece dilanti indicando cu den comision di husticia a ser bisa cu cada cinco aña un caso asina ta sucede, cu loke a ser indica durante e comision di husticia aki ta cu for di 2015 te cu actualidad tabatin cuater incidente a sucede caminda un agente policial a usa su arma. El a agrega cu den e casonan ey un hues a dicta cu e uso di e arma tabata legal.
Pa loke ta pregunta cu tin di haber cu maneho y protocol, e mandatario a indica cu tin protocol riba cada topico. El a remarca cu cada agente policial tin e autoridad discrecionario cu ta indica cu si un situacion presenta, e agente policial ta analisa e situacion y dentro di cuadro di ley e ta dicidi con e ta actua.
Contestando pregunta relaciona cu kico ta e derechonan di ciudadanonan y kico ta e protocolnan pa esaki, minister Tjon a splica cu tin diferente landsbesluit, tin ordennan di cuerpo policial y anuncionan specifico pa loke ta trata kehonan pa loke ta accionnan di polis.
Ademas, el a sigui splica cu tin atencion tambe pa e victimanan y famia di victima cual ta ser haci for di Bureau Slachtofferhulp. Den e caso specifico aki, el a splica cu Alto Comisiario mes aki tin contacto cu e famia y tambe ta e caso for di Ministerio Publico caminda mas tanto posibel ta trata di informa y tene e famianan na altura di e suceso.
Minister Tjon a ricibi pregunta si e polisnan en cuestion a ser scucha como sospechoso of testigo, na cual e l a contesta cu e polisnan a ser scucha den condicion di sospechoso.
Parlamentario a puntra e minister di Husticia cuanto tempo e investigacion lo dura. E mandatario a splica cu ta dificil pa bisa cuanto tempo e investigacion lo dura pasobra ta papia di diferente componente, entre otro, evidencia tecnico cu ta ser manda afo y ta mara na un tempo. El a sigura cu e investigacion tin prioridad di Landsrecherche y Ministerio Publico.
Ademas el a informa cu e investigacion aki ta un investigacion penal.
E topico di falta di personal den Cuerpo Policial di Aruba tambe a ser treci pa dilanti door di varios parlamentario. Minister Tjon a splica cu falta di personal di polis ta alrededor di 40%, cu ta un cifra halto toch. El a remarca cu falta di personal den Cuerpo Policial ta e reto di mas grandi cu tin pa KPA, pero na mesun momento el a subraya cu a pesar di esaki seguridad ta di tur ciudadano ta ser garantisa.
El a ricibi e pregunta pakico KPA no ta busca ayudo den region, na cual el a contesta cu esaki ta tuma luga na momento cu e ta necesario, a base di acuerdonan cu tin.
