Ayera mainta durante conferencia di prensa di Gobierno di Aruba, minister di Husticia y Asutnonan Social, Rocco Tjon, a firma un Letter of Intent cu e representantenan di Vecchia Estates NV, pa e construccion di e edificio Family Justice Center.

Cu e firmamento di e Letter of Intent, minister Tjon a remarca, nan ta compromete nan mes cu un bes e edificio nobo aki keda cla, Gobierno di Aruba ta cuminsa huur esaki pa asina ubica e departamentonan Family Justice Center, Jeugd en Zeden Politie y Bureau Slachoffer Hulp.

“Pa nos e ta sumamente importante, si bo wak e puntonan di salida di nos maneho pa loke ta Ministerio di Husticia y Asuntonan Social, e ta importante pa nos crea e condicionnan adecua pa tur esnan cu ta traha den husticia. Teniendo na cuenta esey, obviamente e parti di infrastructura ta importante pero esaki ta e parti final pasobra ya caba tin hopi inversionnan a tuma luga,” e minister a indica.

El a splica cu manera ta conoci Gobierno di Aruba a inverti den cursonan pa full e veld social y e veld hudicial, pero tambe specificamente pa loke ta trata Jeugd en Zeden Politie. El a indica cu a percura pa a traves “kinterview” tur e zedenrechercheurs awendia ta certifica, pero di otro banda tambe a adapta e maneho y liñanan di guia cu ta wordo usa aworaki door di Ministerio Publico pa loke ta trata casonan di abuso di mucha pa ta mucho mas estricto.

Banda di esey tambe tin e plan nacional pa loke ta trata conscientisacion, cu e proyecto “Mi mesun Heroe” y un parti hopi importante tambe, el a agrega, ta cu a traves di Family Justice Center, un proyecto cu a nace bao di Sociaal Crisis Plan y cu a percura pa mantene su continuidad, a introduci tambe e mediconan forensico cu segun e minister a sigura ta algo unico den e region y cual ta un paso hopi importante ora ta trata investigacionnan di abuso di mucha en general.

“Awe nos ta yega na e parti cu ta hopi importante tambe cu ta e parti di infrastructura. Nos ta hopi satisfecho cu a traves di e Letter of Intent aki nos lo percura pa otro aña e edificio aki ta completamente cla y pa asina tur e personal di Jeugd en Zeden Politie, pero tambe Bureau Slachofferhulp cu ta un departamento cu te dia di awe nunca tabatin un alohamento propio fiho y Family Justice Center. Lo formalisa esaki entre otro den e organisacion di Cuerpo Policial, pero alabes lo percura pa nan tin nan propio edificio. ” Minister Tjon a señala.

E Minister di Husticia y Asuntonan Social a splica cu a tene cuenta cu tur e diferente aspectonan cu ta rekeri tambe ora ta trata partinan infrastructural, specificamente pa e departamentonan aki. El a indica cu e tabata un proceso largo caminda a conta cu participacion di Cuerpo Policial, particularmente Jeugd en ZedenPolitie, personal di Bureau Slachtoffer Hulp y Family Justice Center hunto cu e desaroyadornan cu tabatin un rol hopi importante den esaki pa percura cu e proyecto na final por cumpli cu tur e rekisito- y standardnan internacional.

El a remarca cu ora cu a wak e programa di rekisito, a tene cuenta, pa e edificio aki, cu cambernan di interogacion cu espacionan cu ta specificamente agradabel pa mucha, un punto cu ta hopi importante ora ta trata casonan specifico cu ta encera interogacion di mucha, un studio di camber di interogacion, un sala di control y un camber di retencion pa sospechoso.

Tambe, otro aspecto hopi importante cu e minister a subraya, mirando cu pa prome biaha ta bay introduci mediconan forense, y na e edificio aki lo tin cambernan special pa e profesionalnan aki por realisa nan trabao y tambe lo tene cuenta cu seguridad di camara y sistema di intercom.

“A traves di tur e feedback y input cu nos a haya di tur e profesionalnan di e tres departamentonan, a traves di tur e bishitanan cu a ser realisa door di e desaroyadornan na otro edificionan, nos por a yega na e parti final awe y firma e Letter of Intent,” Minister Tjon a resalta.

Mirando e situacion cu a sucede cu e ex warda di polis di playa, na unda e edificio a bira no apto pa e personal cu tabata traha eyden, durante e ronda di pregunta di prensa, Minister Tjon a ricibi pregunta tocante cual ta e condicionnan cu e minister ta trece pa dilanti den e proyecto aki pa no ripiti e mesun situacion cu a sucede na ex warda di polis di playa.

Minister Tjon a splica den su contesta cu e ta referi na diferente condicion y e parti cu sigur ta importante y pa evita cu no ta bay back na situacionnan manera a sucede caminda e ex warda di polis di playa tabata, e aspecto di mantencion ta hopi importante y ta incorpora den esaki.

El a indica cu den presupuesto di e proyecto a tene cuenta tambe pa cada bes cu algo daña of kibra, esaki wordo renoba of drecha mes ora, un parti cu ta hopi importante den e aspecto di mantencion.

Pero specificamente, el a enfatisa, ora ta trata condicionnan di trabao infrastructural pa Cuerpo Policial, mester tene cuenta cu diferente aspectonan specifico y mas ainda ora ta trata departamentonan manera Jeugd en Zeden Politie, Family Justice Center y Bureau Slachofferhulp. “Pesey tabata asina importante cu den full e proceso aki tur e tres departamentonan aki tabatin participacion. Constantemente tabatin dialogo y reunionnan hunto cu e desaroyador,” el a resalta.

Pa finalisa Minister Tjon a señala cu aworaki den e reorganisacion di Cuerpo Policial cu ta andando, ta bay percura pa formalisa e parti di Family Justice Center. E ta un proyecto cu a nace for di Sociaal Crisis Plan riba peticion di full e veld, pero nunca e no a wordo formalisa y aworaki den e structura di organisacion di Cuerpo Policial, Family Justice Center y Bureau Slachofferhulp ta wordo formalisa.