Ayera mainta ariba su pagina oficial di Facebook, Minister di Husticia y Asuntonan Social, Rocco Tjon a publica cu su persona a entrega un keho penal contra e periodista Patrick Paskel, pa motibo cu e periodista, segun e minister, a haci ponencianan falso contra su persona durante e noticiero local ‘Enfoke.’
Mediante un comunicado, Minister Tjon a splica cu durante noticiero di diamars riba canal 88.9, a traves di e programa Enfoke, Paskel a menciona cu su persona a wordo deteni door di Landsrecherche tempo cu e tabata eherce su funcion den Cuerpo Policial.
El a agrega cu Paskel a bisa tambe cu e detencion tabatin di haci cu un caso caminda un Polis lo a duna informacion clasifica y ricibi placa pa cu esaki, y cu su persona lo a participa den e tipo di acto aki.
Pa medio di e comunicado aki Minister Tjon ta desmenti tur locual e periodista a trece pa dilanti durante e noticiero. “Mi ta desmenti rotundamente tur cos cu a wordo treci padilanti, durante e programa “Enfoke”. Mi persona nunca a wordo deteni of tabata envolvi (ni como verdachte ni como getuige) den un caso di e indole aki. Mi persona no a participa na ningun caso unda un Agente Policial lo a paga un otro Agente Policial pa ricibi ningun tipo di informacion. Mi nunca tabata deteni na Landsrecherche, sigur no pasobra mi no tabata integro den mi funcion anterior,” Minister Tjon a remarca.
El a agrega: “Ta trata un biaha mas di un mentira indignante, pa es motibo, un keho penal lo ser entrega debidamente en contra di esaki. E tipo di engañonan aki ta atacha e imagen di mi credibilidad como persona y como minister di Husticia y Asuntonan Social, simplemente pa crea rabia den comunidad y pa bruha tera.”
Mester menciona cu esaki no ta prome biaha cu Minister Tjon tin friccion cu e medio di comunicacion en cuestion y na algun ocasion e mandatario a nenga di contesta pregunta di parti di e medio di comunicacion aki.
