Ayera minister di Salud y Deporte Alex Schwengle, hunto cu representantenan di ASU (Aruba Sport Unie) Lotto, COA (Comite Olimpico Arubano) y Subsidiecommisie a brinda un aclaracion tocante maneho di subsidio/fondo pa deporte na Aruba.
Minister Schwengle a laga sa cu tin suficiente placa pa aporta pa nos deporte pero falta algun adaptacion den e maneho di esaki. “Anto esey ta locual ta mi tarea.
Por ta boso no ta wak mi ta tira un bala tur fin di siman riba un veld, ta pasobra mi ta haciendo mi huiswerk trahando duro no solamente pa drecha salubridad so, pero tambe hunto cu partners pa nos drecha mundo deportivo.” E ta reacciona riba e critica cu organisacionnan mester sali riba caminda pa pidi pueblo placa, manera tabata e caso cu Pony League.
Placa pa federacion
Segun minister Schwengle, na 2017 riba papel nan a otorga 3,1 miyon cu lo wordo duna na diferente federacionnan deportivo y proyectonan via Subsidiecommisie. Na momento aki ya caba a duna 1,3 miyon y falta 1,7 miyon ainda pa resto di aña. A pesar di e placa ey, extra subsidio a wordo duna for di minister como tambe via Subsidie commisie mes, cual ta un suma di rond 400.000 florin caba. “Nos tin mas ainda cu por bay duna extra pero e extra ey ta bay solamente si bo ta cumpli cu rekisitonan cu ta para den e subsidieregeling. Esey ta e palabracion cu nos tin cu otro.”
Reglamento pa haya subsidio
Na momentonan aki, segun e mandatario, tin ainda hopi federacion cu no ta cumpli cu tur reglamento di subsidieregeling. “Nos a bisa tambe cu gradualmente nos ta bay drecha e disciplina. ” Pasobra segun e minister, si bo tabata tin un manera di financia deporte sin ningun regla, djis dicta y duna cualkier team cu kier, esaki ta crea un tipo di ‘free for all’.
Algun di esakinan ta entre otro cu pa bin na remarca pa subsidio, e federacion/organisacion mester ta afilia na ASU of COA, cu excepcion cu ta Lifida, Little League of Special Olympics. Tambe e organisacion mester ta activo tur aña cu un campeonato nacional, cu un directiva activo conforme statuut.
Asina tin un lista di algun cos mas cu ta wordo adapta periodicamente si sali afo cu esaki ta necesario.
Plan strategico mas specifico
Minister Schwengle a enfatisa cu mundo deportivo na Aruba tabata falta unidad di vision y un plan strategico. Entre e mandatario y tur e partnernan encarga, a skirbi e plan strategico den un documento y presenta esaki na tur federacion di deporte. “Nos tin un letter of intent unda cu e partnernan ta bisa bo tambe cu nan ta para den liña grandi cu e documento aki anto uz’e como base pa traha un plan strategico mas specifico ainda cu enfoke riba nos muchanan y top sport pero tambe pa bira mas sabi y crea mas placa den deporte.”
Renobacion di facilidadnan
Den presupuesto di gobierno, segun minister Schwengle 12,7 miyon ta bay pa deporte. Un gran parti ta bay na Ibisa (6,2 miyon), y di esaki 2,2 miyon ta bay na subsidie pa ASU, COA y FAMFD (Fundacion Arubano Maneho di Facilidad Deportivo). Pa mantencion di otro facilidadnan di deporte, na 2016 a wordo otorga 2,9 miyon florin. Via Lotto ta haya un entrada cu e aña aki a subi na 4,5 miyon; sin conta e surplus cu tin e aña aki 2 miyon extra via Lotto cual lo wordo uza specificamente pa renobacion di facilidadnan deportivo, segun minister Schwengle a laga sa.
