Minister Plenipotenciario mr. Ady Thijsen tabatin un reunion cu presidente di MKB Nederland Jacco Vonhof.

Meta di e bishita aki na prome instante ta pa cera conoci y alabes intercambia riba algun temanan cu por ta di importancia pa Aruba riba e tereno di empresa chikito y mediano. Sr. Thijsen a papia cu sr. Vonhof riba con e pandemia tabata un sla duro pa Aruba su economia, mirando cu e pilar principal ta turismo. Na mes un momento, segun Minister Thijsen a bisa cu Aruba ta un di e paisnan cu a recupera mas liher despues di e pandemia. “Esaki ta desaroyonan cu institutonan financiero manera IMF tambe ta vocifera. Un cos importante cu nos a siña di e pandemia ta cu Aruba mester diversifica su economia.

Antes Aruba tabata un pilar economico grandi cu tabata e refineria y turismo. Awor aki ta solamente turismo ta e corki riba cual e economia ta draai. Den cuadro di esaki Aruba ta parti di transicion pa energia alternativa. Un MOU a caba di wordo firma entre companianan estatal di utilidad di Aruba cu e compania spaño Accionna Energia. Hunto cu e uso di LNG pa produccion di electricidad, ta haci Aruba un trendsetter den region Caribense.’

‘E siguiente paso ta agricultura, unda cu nos ta den combersacion cu Universidad di Wageningen riba posibilidadnan riba e tereno aki. Loke tambe ta importante ta stimulacion di e sector di empresa chikito y mediano, cu ta e weso di lomba di nos economia. Mi ta kere cu pa medio di cooperacion lo mester por stimula nos hendenan pa ta un bon entrepreneur. Tambe lo mester mira unda por haci e proceso mihor y duna structura unda esaki ta nesesario. Nos mester crea un ambiente unda principalmente nos hobennan cu hopi biaha tin un bon idea, haya e guia y instrumentonan con pa lanta nan mesun negoshi. Aruba tin hopi potencial, pesey lo ta bon pa mira unda MKB Nederland por yuda comerciantenan na Aruba,’ asina Minister Thijsen a bisa.

Presidente di MKB Nederland Jacco Vonhof a bisa Minister Thijsen cu e ta reconoce hopi den loke e mandatario a bisa cu e situacion cu empresanan MKB na Hulanda. Vonhof: ‘MKB Nederland tin hopi experticio y sigur nos ta dispuesto pa sondea maneranan unda nos por yuda y duna sosten na comerciantenan na Aruba. Lo ta bon pa inventarisa kico falta cerca e comerciantenan, pa nos por mira riba cual tereno nos por ta di nesesidad. Con bo ta organisa, lo mester bin mas investigacion riba esaki. Nos ta bai mira den seno di MKB Nederland y otro partnernan na posibilidadnan.’

Minister Thijsen a bisa di ta contento cu MKB Nederland ta habri pa brinda e cooperacion nesesario. ‘Na e momento cu Aruba ta den pleno reformacion riba diferente tereno den cuadro di e “Onderlinge Regeling, ta e momento pa stimula e sector di empresa chikito y mediano. Nos sa di empresnan na Aruba cu tin un bon producto, cu awor aki nan ta exporta entre otro pa Curaçao, mientras cu e producto tin potencial pa wordo exporta pa Europa.

Akinan nos mester crea posibilidad pa e comerciante por tuma e pasa y crece cu su empresa. E bentaha di esaki cu si mas Arubiano ta exitoso comercialmente, esaki ta un beneficio grandi pa Aruba, unda e empresanan ta inverti den economia di Aruba, dus e placa ta keda Aruba,’ asina Minister Thijsen a bisa.

E palabracion a keda haci cu Minister Thijsen lo bai inventarisa cerca e organisacionnan empresarial kico ta nan nesesidadnan y despues reuni cu otro atrobe. Minister Thijsen a gradici Jacco Vonhof pa e reunion sumamente ameno y tin e confiansa cu tin manera pa cooperacion.

E potret ta cortesia di Arubahuis.