Den e proximo dianan casi mil hende lo haya un carta riba nan peticion di tereno. Esaki minister di Infrastructura Benny Sevinger a anuncia. E ta informa tambe cu el a cambia maneho. Entre otro a pidi banconan pa no haci un investigacion profundo mas di persona su situacion financiero momento ta pidi tereno.
“Nos a papia cu banco y a bisa nan cu nos ta prefera pa nan no haci un investigacion profundo di e persona su situacion financiero. Banco ta simplemente wak cuanto placa e persona aki ta gana y cuanto placa e por haya na fiansa (hypotheek) pa e por traha su cas. Basa riba esaki e persona ta hiba e carta na DIP cu ta wak cual tereno den e bario cu el a pidi ta disponibel. Esaki ta depende e grandura di e tereno y e carta cu e persona a haya di e instituto financiero.”
Pa regla esaki e mandatario a sinta hunto cu e asociacion di banconan, cu institutonan financiero y Fondo di Garantia. Segun e, banconan a indica cu nan lo coopera. “Nan tambe ta di opinion cu ta bon pa economia pa mas hende traha cas, pero tambe ta wak e como un responsabilidad social di nan pa yuda e comunidad pa yega na su propio cas.” Bon Dia Aruba no a logra di confirma esaki independiente na e asociacion di banconan ainda.
No ta duna ‘optie’ mas
Un otro cambio den e maneho di otorga tereno di erfpacht ta cu e minister a dicidi di kita e areglo pa duna optie riba tereno. Pues personanan no ta haya un opcion unda nan tin seis luna pa cumpli cu e rekisitonan manera financiamento y mapa. “Eventualmente mayoria hende no por cumpli y ta pidi verlenging y mas verlenging. Esaki tin como resultado cu un hende ta wanta un tereno te hasta dos aña prome cu e por keda cla of e no ta keda cla mes, mientras cu un cu si por cumpli ta wardando”, segun sr. Sevinger.
Cu e maneho nobo e personanan cu a pidi tereno, lo ricibi un carta den cual ta bisa cu tin un tereno reserva pe na tal luga y e tin un luna pa busca un carta di banco. Pa motibo di esey e mandatario a palabra cu e banconan pa no haci un investigacion profundo mas pa asina e proceso no tarda mas. Manera menciona e mandatario a anuncia cu for di gobierno nan ta bay manda carta pa casi mil hende riba nan peticion di tereno. Asina e ta premira cu banconan y otro instancianan financiero lo haya hopi hende den e proximo dianan cu nan peticionnan pa haya carta for di nan.
Motibo pa e maneho nobo segun e minister, ta pa e proceso di otorgamento di tereno ta bay mas lihe. Manera Bon Dia Aruba ya a skirbi varios biaha, tin 11.000 peticion pa tereno erfpacht na DIP. E departamento aki a bisa cu no tur lo haya tereno. Cu e cambio di maneho e minister ta indica e tambe kier duna e economia un push nobo.
