Encuanto si gobierno a logra caba un acuerdo cu Ecotech pa tuma over e recogemento di sushi domestico, minister Mike de Meza a declara na e matutino aki cu ainda nan ta analisando e diferente aspectonan rond di dje.

Den reunion cu el a yega di sostene cu sindicato STA y Seppa y nan delegadonan, e mandatario a splica nan cu “caminda tin sinergia bo lo por haci uzo di dje”.  E ta haya cu tin sinergia entre e dos compania, esta Ecotech y Serlimar, y e ta un win-win situacion pa tur dos compania cu nan por haci uzo di dje. El a trece como ehempel e sinergia cu ta existi entre Digicel y Setar, caminda ambos compania un di sector priva y otro estatal ta traha cu otro. P’esey e ta haya cu Ecotech  lo por traha cu  Serlimar tambe; ya cu nan ta haci uzo di e dump, y Ecotech ta un cliente sumamente grandi di Serlimar. E mandatario ta kere cu esun cu ta haci of kier pa no tin niun relacion entre ambos compania “ta ekiboca su mes”.  Ya cu si pa ehempel awe Ecotech  mester stop di haci uzo di e dump, Serlimar ta perde alrededor di 4 miyon florin. “Den negoshi general semper companianan ta busca sinergia pa haci trabou cu otro. Esey ta algo normal”, asina e mandatario ta declara.

Minister: dump ta un situacion alarmante
E ta haya cu nos tin un situacion alarmante den e dump y como gobierno nan tin cu busca un solucion.  E por ta un solucion  na corto plaso,  mediano y largo plaso, y den esey lo por tin momentonan cu un ta haci uzo di servicio di otro. Esaki no ta nifica –segun e minister- cu hendenan ta bay perde trabou, “totalmente cu no”.

E ta bisa cu realidad lo ta cu Serlimar lo bay haya hopi mas trabou. Pues e chens ta hopi grandi cu nan mester busca mas trahado acerca, segun minister De Meza. No solamente nan tin cu bay sanea e dump, pero traha un luga nobo y ehecuta hopi trabou. Gobierno ta bay como Serlimar tambe pa atende cu tur e buraconan cu tin rond di Aruba. “Ta hopi trabou tin.” Nan ta trabou cu por dura entre 10 pa 20 aña largo pa nan tin e situacion di saneamento bon controla. Na final minister de Meza a declara cu esunnan cu ta purba crea obstaculo y incertidumbre “ta hacie puramente pa consumo politico local”.  E ta haya esaki un lastima pasobra un cierto momento door di purba tranca progreso bo ta causa daño na e mesun compania y nan futuro mes, enbes di protege nan. “Si bo no ta hacie otro ta bay hacie. Aruba no por bira sushi pasobra pa actitud di cierto politiconan cu ta tranca progreso”. E ta haya esaki un lastima. E ta kere cu na aña 2017 cu por cierto ta un aña electoral nan tin cu madura politicamente den esey. Sinembargo Bon Dia Aruba ta constata cu no tin bista riba ki dia lo cuminsa mehora e situacion y baha e molester pa e habitantenan cerca di e dump Parkietenbos. Ta awor gobierno no a indica den cua termino ‘lo cera dump’ manera priminti na november. Y tampoco ta conoci ki momento gobierno lo atende cu e peticion di un grupo di habitantenan pa stop e candela riba dump, cual pa nan ta e molester mas grandi, afectando nan salud casi diariamente.