Minister Chris Romero encarga cu agricultura a compromete su mes di cera mas contacto cu institucionnan den nos region, ‘pa asina logra yega na un intercambio di informacion mas eficiente y beneficioso pa nos agricultura’.
“Tur esaki cu e pensamento pa den un futuro por logra yega na un independencia comestibel pa Aruba”, segun e minister.
Esaki e ta bisa den un relato riba un encuentro cu TNO y Santa Rosa unda a duna e mandatario un splicacion riba nan proyecto di aquaponics y hydroponics.
E proyecto ta encera creacion di modelonan aquaponico y hydroponico, den cuadro di sostenibilidad, cual por logra contribui na un cantidad mas grandi di tanto berdura como pisca den e clima cayente cu nos ta biba aden. Tur esaki manteniendo e regla principal di baha e gastonan significante pero uzando materialnan duradero.
Teniendo na cuenta cu nos clima ta uno severamente seco, ta adaptando e proyecto aki pa e por ta uno factibel pa nos isla. E proposito principal di e proyecto aquaponico y hydroponico aki ta pa adapta e structura completo, cu tur datonan disponibel, na e clima di Aruba.
Actualmente Santa Rosa a logra produci diferente mata herbal y hasta algun berdura uzando e structura aquaponico y hydroponico. Awor lo bay cuminsa cu e proceso di recoleccion di cifra y datonan pa asina completa e parti tecnico di e proyecto, asina e relato ta informa.
