Ministerio Publico a confirma riba preguntanan di Bon Dia Aruba cu nan a agrega e acusacion di traficacion di hende den e caso contra minister Paul Croes pa motibo di e trahado ilegal haya den su cas.
Riba 28 di maart husticia a topa riba un muhe trahando den e cas di e minister di Labor como ayudo domestico sin cu e tabatin permiso. E muhe a wordo scucha y diamars awor Ministerio Publico a dicidi di amplia e acusacionnan contra e minister cu traficacion di hende. Pa motibo cu traficacion di hende ta un echo castigabel grave y den otro casonan na Aruba a mira cu husticia a deteni sospechosonan, Bon Dia Aruba a puntra Ministerio Publico kico e maneho ta. A base di informacion di e fiscal liderando e investigacion, e vocero ta splica nos cu ‘cu cada investigacion tin su mes strategia y su mes un ritmo dentro di cual cosnan ta sucede’. E ta continua cu: “Un investigacion chikito ta logicamente mas rapido. Pero un investigacion grandi y compleho manera esaki tin un caminda den tempo full propio di e investigacion. P’esey mester warda manera cosnan ta desaroya.
Nos nunca lo bisa di antemano ki paso lo tuma den un investigacion.” E decision pa detene un sospechoso ta den man di fiscal y e team cu ta hiba e investigacion, e vocero tambe ta bisa. “Loke ta miho pa un investigacion y e rumbo cu kier bay cu ne, esey ta determina e decisionnan, tambe pa loke ta detencion di sospechosonan.”
Ki criteria mas Ministerio Publico ta uza no ta conoci. Locual Bon Dia Aruba si sa ta cu detencion di sospechosonan tambe ta depende di con grave e acusacion ta y con pisa e castigo. Den e codigo penal ta para cu riba e echo castigabel di mensenhandel, hues por imponi un castigo maximo di 8 aña den prizon of un boet di 100.000 florin maximo.
