Recientemente durante e bishita cortico di Minister Asuntonan Interno, Raymond Knops, el a keda satisfecho di e bishita cu el a haci na Fundacion Hende Muher den Dificultad (FHMD ) y e instituto medico Imsan na San Nicolas.
Tanto Prome Minister Evelyn Wever-Croes como Minister Knops durante e bishitanan aki na unda ambos a expresa nan satisfaccion pa e trabounan cu ta wordo haci tanto na FHMD como na Imsan.
Minister Knops por a wak con e fundacion si Fundacion Hende Muher den Dificultad ta funciona y ta comprometi cu hende muhe cu ta wordo maltrata. Danki na e sosten financiero di Hulanda, e capacidad lo wordo engrandece di 5 pa 11 camber. Prome Minister a expresa cu e ta satisfecho di e trabou cu e fundacion ta haciendo. Director di e FHMD Suzy Kock y coordinador Magali Maduro a duna hopi informacion di tur e trabou cu e fundacion ta realisa tur dia y tambe a contesta tur pregunta cu a wordo haci na nan.
Despues di e bishita na FHMD, e delegacion a bay rumbo San Nicolas pa bishita e instituto medico Imsan. Aki ta unda cu Prome Minister y Minister Knops a wak e cambernan cu recientemente a wordo renoba, entre nan e camber di operacion y e camber di radioterapia.
“Mi ta impresiona cu e inversionnan di Imsan y e vision cu Director Dr. Joel Raijnherc a establece. Imsan sin duda lo contribui grandemente na e mehoracion di asistencia di cuido medico”, Prome Minister a expresa.
Tambe Minister Knops a expresa durante su conferencia di prensa cu e ta satisfecho cu e stapnan cu Gabinete Wever-Croes ta tuma pa pone Aruba bek riba e caminda pa finansas publico sostenibel y a menciona tambe e bon relacion entre Aruba y Hulanda.
