Gobierno a bay over na uza otro metodo pa calcula e prijs di benta di gasolin na Aruba, saliendo for di e prijs riba factura cu RDA a paga pa e compra di gasolin, teniendo na cuenta tambe e reserva cu tin di e producto den tanki.

Segun un comunicado di gobierno, pa largo tempo Gobierno a haci uzo di e plataforma Platts pa calcula e prijs di producto petrolero basa riba un promedio di cual tabata e benta di e productonan aki riba e mercado internacional, teniendo na cuenta un luna di retraso den dicho informacion. Como cu RDA ta un compania di Gobierno di Aruba, a presenta e posibilidad pa yega na e factura di locual realmente ta wordo paga pa compra di gasolin, y a base di esaki stipula e prijs di benta di gasolin pa publico. Antes, ora cu e compra y abastecemento di producto petrolero tabata den man di multinacionalnan na Aruba, e informacion aki no tabata disponibel pa Departamento Economico, na unda ta haci e calculo di prijs. P’esey pa largo tempo a recuri na e informacion cu Platts ta ofrece pa por a stipula e prijs di benta di producto petrolero na publico.

Ta absorba subida di periodo di transicion
Pa e periodo di transicion, Gobierno a yega na un acuerdo cu RDA cu lo absorba gran parti di e subida grandi cu tabata tumando luga na e momento ey, y esaki a traduci su mes den un subida di 11,8 cen den luna di mei 2019, cu mester conta como un subida total pa e lunanan di april, mei y juni, pa cual RDA a cumpra y tin reserva di gasolin. Si no a haci e cambio di metodo y e areglo transitorio aki, Pueblo lo mester a conoce subida di prijs di gasolin den luna di april di 16 cen, subida di 13,9 cen den mei y un subida di 7,6 cen den juni. Cu e cambio aki, Gobierno a percura pa trece tiki alivio den cartera di Pueblo.

Beneficio di e metodo nobo ta menos fluctuacion den prijs
Cu e manera di calcula prijs via e factura, cu ta mustra kico realmente RDA a paga pa compra di gasolin riba mercado, y teniendo na cuenta e prijs cu a ser paga pa e gasolin cu tin den reserva den tanki, ta spera di por yega na un prijs cu ta fluctua menos cu e prijs cu ta wordo stipula a base di e anotacion di Platts, manera cu pa largo tempo a wordo haci pa Departamento Economico di Aruba.

Prijs di gasolin den juni ta mas abou cu e rebaho segun Platts
Riba e plataforma di Platts nos por mira cu prijs di gasolin a baha den luna di juni, pero asina mes cu den juni no a conoce rebaho di prijs, e calculo nobo a ofrece un prijs hopi mas abou y Pueblo a ricibi un alivio hopi mas grandi cu si mester a uza e prijs rebaha di Platts.