Minister Ruiz-Maduro ta duna un bista di e cambio real riba: Aumento di accijns y impuesto di importacion

Minister di Finansa, Asuntonan Economico y Cultura  ta informa riba e aumentonan di accijns y impuesto di importacion y ta duna un bista di e cambionan real riba algun bebida sterki y biña.

Whiskey
E aumento di accijns riba whiskey ta 44%. E porcentahe aki ta calcula a base di e prijs pa cada 100 liter (hectoliter). Esaki ta nifica cu pa un boter di whiskey di un liter, e aumento di accijns ta Awg 9.75. Considerando cu e tarifa di accijns bieu ta Awg 22.10, cu e tarifa nobo di accijns  e aumento di 44% ta bira Awg 31.85 pa un boter di 1 liter di whiskey. Por ehempel si un boter di whiskey di un liter ta costa Awg 50.00 cu e aumento di accijns aki e ta costa awor Awg 60.35 excluyendo BBO.

Biña
Pa un boter di biña di un liter, e tarifa bieu di impuesto di importacion ta Awg 4.00 . Cu e aumento di 8.25% na impuesto di importacion e ta subi cu Awg 0.33 y e tarifa nobo di impuesto di importacion pa boter di biña ta bira Awg 4.33. Esey ta nifica cu si por ehempel un boter di biña di 1 liter tabata costa AWG 20.00 cu e aumento di impuesto di importacion di AWG 0.33 /liter e mesun boter di biña lo bay costa AWG 20.35 excluyendo BBO. E boter di biña aki ta subi cu Awg 0.35. Pues no ta asina cu e prijs di e boter di biña ta subi cu 333%.

Cerbes ‘stout’
Un boter di Cerbes ‘stout’ di 1 liter e accijns ta subi cu AWG 4.33 y pa un boter di 33 cl e accijns ta aumenta cu AWG 1.40 excluyendo BBO.

E meta di e comunicado aki ta pa brinda informacion riba cuanto ta e aumento real di accijns y impuesto di importacion respectivamente. E mandatario ta informa e consumidor pa ta consiente di e aumentonan aki cual no necesariamente mester ser hustifica den un cambio grandi den prijs di e producto.

Pa mas informacion riba e cambionan, por bishita e website di Aduana www. douane.aw of tambe por tuma contacto via emailadres info@douane.aw.