Minister Ruiz-Maduro a reuni cu ehecutivonan di Standard & Poor’s pa e evaluacion di nos pais su situacion financiero y economico. Ruiz-Maduro a splica di e pasonan cu Gabinete Wever-Croes ta tuma pa stabilisa e situacion financiero di nos pais, y tambe kico ta wordo haci pa incentiva y agilisa e proceso economico na nos pais.
Importante ta cu Gobierno, entre otro, a fiha un caminda concreto pa cana den su Memorandum Financiero Economico y tambe a publica e maneho economico pa un Aruba Fuerte y Resistente y Aruba ta bezig ta ‘deliver’ e resultado cu a wordo premira pa por yega na un finanzas publico manehabel cu ta brinda un base stabiel pa economia por cuminsa florece, segun un comunicado di gobierno. Cu e reforma fiscal tambe Gabinete Wever-Croes kier trece e cambionan necesario pa un sistema mas simpel y husto pa nos pais.
E evaluacion di Standard & Poor’s ta importante, ya cu inversionista ta evalua, entre otro, e resultado di nan evaluacion pa haya sa mas di e credibilidad financiero di nos pais.
Standard & Poor’s den e dianan aki lo reuni cu mas departamento di Gobierno y instancia pa asina nan por haya un bista completo di e situacion financiero y economico di nos pais. Nos ta spera cu tur persona y instancia cu atende cu Standard & Poor’s por brinda e informacion necesario y por tene na cuenta cu di nan esfuerso y participacion positivo, e credibilidad financiero di nos pais Aruba ta depende.
