Diamars mainta Minister Xiomara Ruiz-Maduro a reuni cu San Nicolas Business Association Aruba riba e ultimo desaroyonan. Dentro di poco SNBA lo organisa un Cumbre di Comercio pa San Nicolas pa cual nan a extende un invitacion.
Segun e comunicado cu Bon Dia a ricibi ta bisa, cu e mandatario ta contento di mira cu SNBA ta trahando pa incentiva proyectonan pa San Nicolas y Pariba di Brug en general. Den e vision di Gabinete Wever-Croes pa economia di nos Pais tin atencion special pa desaroyo na San Nicolas.
Durante e reunion Minister Xiomara a brinda un copia di e Maneho Economico na Presidente di SNBA pidiendo e organisacion pa nan sosten den e trabou cu mester keda realisa pa asina San Nicolas por conoce un desaroyo sostenibel na bienestar di henter Aruba.
Minister Ruiz-Maduro ta gradici SNBA pa nan trabounan y a expresa di ta contento di por sostene SNBA su trabounan atraves di e experticio di Nassy, kende e mandatario a pone na disposicion di e organisacion.
