Siman pasa minister Ruiz-Maduro a reuni cu Pascal Thierry Clivaz, director suplente di Universal Postal Union (UPU).
Universal Postal Union ta e agencia intergubernamental specialisa di Nacionnan Uni cu ta percura pa coordina e maneho postal di e Paisnan miembro y tambe pa e sistema di post cu ta wordo uza na henter mundo.
Segun e comunicado cu nos a ricibi ta indica, e bishita tabata uno ameno y hopi informativo den cual Thierry Clivaz a splica riba e beneficionan cu UPU ta ofrece na su miembronan, e retonan cu ta vislumbra y e oportunidadnan cu esaki ta trece cune.
Thierry Clivaz a splica cu UPU no solamente ta percura pa e sistema postal por traha eficientemente entre e paisnan, pero tambe ta concentra riba inclusion financiero brindando acceso financiero na esunnan cu dificilmente por tin acceso na servicio financiero. UPU kier yuda ‘bank the unbankable.’
Hunto cu esaki UPU ta ofrece un sistema automatisa di pago cu por wordo uza ora ta trata di e-commerce. Di e manera aki UPU kier facilita e ciudadano of e companianan chikito y mediano cu no tin acceso na sistema di pago online, manera por ehempel PayPal, cu un sistema di pago universal pa por haci uzo di e-commerce. Pa Aruba unda cu 90% di companianan ta chikito of mediano, un alternativa di pago asina sigur lo ta deseabel pa asina por tene gasto di transaccion abou.
Un di e motibonan di UPU su bishita den nos region tin di haber tambe cu e noticia cu Merca lo kier retira su miembresia for di e union postal cu ta data di aña 1874 y esaki por tin consecuencia serio pa e continuidad di e servicio postal regional ya cu por ehempel Miami ta un hub importante pa post pa nos region.
Ta bin acerca cu asina cu un pais no ta forma parti mas di e union postal, e pais no lo por uza e sistema universal di post mas y esaki lo trece desavio sigur pa e paisnan na mundo y sigur den nos region cu ta conta riba e conectividad aki.
Minister Ruiz-Maduro a gradici Thierry Clivaz pa su bishita y e informacion importante cu a ser comparti y a brind’e un recuerdo di Aruba.
