(CuraçaoChronicle) – Minister di Economia di Corsou, ta bisa den un comunicado di prensa cu el a tuma nota cu cierto documento confidencial y tecnico di compania di utilities, Aqualectra, a leak den medionan di comunicacion apenas dos dia despues di comienso di aña.

Cijntje ta bisa cu esaki ta lamentable ya cu esnan nombra den Hunta di Comisario mester sigur protege e interesnan di e compania den cual nan ta nombra.

Diabierna ultimo, atardi laat, a e-mail e rapport forensico na management di Aqualectra, y e minister tambe a ricibi un copia di e e-mail aki. “Naturalmente, durante temporada di fiesta, ta imposible pa gobierno (AVA) of mi mes como representante di e accionista tin oportunidad pa tuma nota di e contenido te cu mi studia y discuti esaki cu esnan responsable pa operacion y servicio di compania Aqualectra of como e entidad cu a comisiona e rapport. Mi ta lamenta e manera con e proceso aki a desaroya,” e minister a bisa.

Den e publicacion, ta mustra como si e renuncia di e tres miembro di Hunta di Comisario a tuma lugar diripiente. Desde 30 di november 2023, presidente di e hunta a informa e minister cu for di dia 1 di januari 2024 e lo ta tumando su retiro ya cu e tin otro compromiso den un institucion financiero.

Inmediatamente, Cijntje a tuma e medidanan necesario pa inicia e proceso pa nombra un Presidente nobo pa e hunta pa salvaguardia e interesnan di Aqualectra.

Dia 27 di december, finalmente, despues di varios luna, e rapport forensico a keda cla y riba dia 29 di december, dos otro miembro di Hunta di Comisario di Aqualectra a dicidi di tuma nan retiro. Cijntje ta bisa cu e no sa si tin un conexion entre e dos evento aki.

Actualmente tin otro miembro cu ta keda den e Hunta di Comisario di Aqualectra, y e proceso pa nombra e presidente ta progresando, segun e minister. Tin un candidato bayendo den e proceso legal. Ademas di esaki, gobierno a inicia e procedura pa yena e vacaturanan restante, incluyendo esnan cu a bira conoci formalmente riba dia 1 di januari ultimo.

“Relaciona cu e parti di e rapport forensico cu a keda cla, mi kier enfatisa cu tanto Hunta di Comisario y Bureau Telecomunicacion y Post (BTP) a cuminsa e investigacionnan aki riba mi propuesta y insistencia. Pa e motibo aki mi ta sostene completamente cu e investigacionnan aki ta tumando lugar pa duna claridad riba asuntonan interno di e compania. Awo, nos mester analisa e resultadonan di e rapport pa pone rumbo pa futuro di Aqualectra, pa bienestar di pueblo di Corsou,” e minister ta bisa.

“Un cos cu mi kier enfatisa ta cu, sea pa bon of malo, cada persona responsable mester responde y duna cuenta pa e motibonan pa cualkier situacion cu a presenta na Aqualectra. Retiro no ta absolve ningun hende di nan responsabilidad,” e minister a enfatisa den su comunicado di prensa.

Teniendo consideracion cu e rapport a keda distribui den prensa, Cijntje urgentemente a solicita gobierno, Autoridad Forensico cu a haci e rapport, y tur individuo involucra cu cualkier responsabilidad den Aqualectra pa dun’e e chens pa studia y trata e rapport di un manera profesional.

“Aqualectra ta crucial den nos bida y pa desaroyo economico di Corsou. Ora tin blackout nos tur ta sufri y e pais ta perde. Pues mi ta implora tur hende cu ta balora e avance di nos pais Corsou pa trata e rapport aki cu madurez y di un manera profesional. Pa awo, como representante di AVA pa Aqualectra, mi no ta bay duna comentario riba e contenido di e rapport forensico te cu nos haya oportunidad pa formula un perspectiva riba dje. E leak di e rapport aki, cu apenas a bin den ultimo dianan di e siman di cambio di aña, ta provoca hopi pensamento,” e minister a conclui.