Ayera mainta, minister di Comunicacion, Transporte y Sector Primario, Chris Romero a ofrece un conferencia pa medionan local y asina trece dilanti un splicacion tocante con e medida di toque de queda ta wordo aplica pa piscadonan. Tambe a duna relato di loke ta trata ‘spearfishing’.

Romero a bisa cu den temporada anterior cu toque de queda a tuma luga, na final a logra pa piscado por haci esaki y a sucede na un manera caminda cu e tempo ey nan a registra na Santa Rosa. Ey nan a haya un certificado cu por comproba cu nan por a sali y pisca den oranan determina, y no ta stroba e toque de queda di un manera of otro.

E tempo ey, Romero a informa cu no tur boto a logra registra,pero nan si a zorg pa por saca nan papelnan y nan vergunning pa por ta na ordo. Aworaki cu e medida a wordo implementa un biaha mas pa e proximo dos siman, segun el a sigura e piscadonan por sigui haci esaki sin problema, pero cu cierto rekisitonan cu mester mantene na regla.

Manera a keda informa, toque de queda ta cuminsa 12or di marduga y ta culmina 5or di mainta. Esey ta nifica cu piscadonan cu ta sali y pisca den oranan di anochi lo mester haci’e prome cu 12or di marduga y tin cu bin back despues di 5or di mainta.

Tambe el a informa cu piscadonan tin otro regla cu mester mantene, esaki ta referi cu mester tin maximo 3 persona riba boto y tambe mester tin tapaboca bisti si no por cumpli cu e distancia rekeri. Cu esaki el a bisa cu e idea ta pa duna nan e oportunidad pa por sali y trece e pan riba mesa pa nan famia.

Asina mes, e boto mester ta registra na Directie Scheepvaart y su vergunning mester ta actualisa, como tambe e boto mester ta operacional cu keuring, pa den caso cu Kustwatch presenta nan por haci nan trabou.

Di otro banda Romero a papia di e polemico topico di spearfishing. El a splica cu for di 2018 su persona hunto minister di Husticia, Andin Bikker den reunion di minister a tuma diferente decision caminda cu nan a bin cu spearfishing, pero na un manera responsabel y regular.

El a informa cu siman pasa el a reuni cu comision di Flora y Fauna, na unda a indica cu un di e problemanan ta cu tin un ley cu mester ehecuta completamente, cu ta e Ley di Flora y Fauna. Segun esaki cierto especienan mester wordo proteha, pero loke Gobierno kier mustra ta cu eigenlijk “un persona cu ta bay tira pisca, no ta bay pa tira coral ni tira pesca di coral y den esey tin un mal comprendemento.” Den e discusion a trece diferente puntonan dilanti, y esaki ‘ta bayendo na un bon caminda’, Romero a manifesta.

Ademas, el a bisa cu pa por bin cu un ley pa spearfishing y asina e personanan por hacie sin ningun problema, mester separa e cosnan aki for di otro. Un cu ta para den ley pa proteha e medio ambiente y banda di dje nan ta bay sigui cu spearfishing. Otro siman, nan tin un reunion cu Kustwatch pa asina presenta nan recomendacion.

“Aruba mester mantene su mes na tratadonan internacional y esey ta e parti importante”, Romero a declara.

Di loke ta trata e dañonan cu spearfishing por trece cune, el a comenta cu e dañonan no por wordo compara cu esun di hendenan cu ta pisca na baranca of riba un boto mes. Eynan ta minimo y hasta por selecta ki pisca e ta bay tira, aunke nan no lo acepta tiramento den coral, pa motibo cu tin piscanan proteha door di tratadonan internacional.

Den dianan aki diferente opinionnan a wordo bisa y presenta riba rednan social di parti di piscadonan cu no ta conforme cu e maneho cu Romero ta bin realisando. Tocante esaki el a bisa cu e problema di piscadonan tabata e ley di Flora y Fauna, cu ora nan a drenta na gobierno na 2017 nan a topa cu e ley aki. Den dje tabatin hinca cierto especienan cu pa e piscadonan tabata un problema.

“Den e tres aña aki, mi a zorg pa esaki no ta un problema pa nan”, el a sigura.

Asina mes, el a informa cu nan tin hopi tempo caba reuniendo cu comision di Flora y Fauna pa splica nan kico ta e dolor di piscadonan, pa wak con ta bin regula cierto especie y cierto temporada cu por haci’e na Aruba.

Romero a anuncia cu otro siman nan tin diferente proposicionnan di cada partido. Di nan banda como ministerio ta manda consehonan pa wak con nan ta bay hacie, principalmente pa e lista di pisca di con ta bay regul’e, cu ta keda di cada banda.