Minister Romero tocante implementacion di aplicacion nobo pa taxista: ‘Mester haci algo pa proteha taxista’

Ayera durante un conferencia di prensa di Minister di Comunicacion, Transporte y Sector Primario, Chris Romero a duna di conoce cu ministerio tin plan pa implementacion di un aplicacion pa taxistanan na Aruba.

Romero a splica e idea tras di esaki y kico e posibilidad ta pa esaki por duna un miho servicio pa turismo. Di mesun manera el a informa cu ta bringando cu diferente aplicacion cu ta brinda e servicio di transporte ey cu kier drenta na Aruba, como por ehempel Uber, of Easy Taxi.

“Tecnologia ta avansando constantemente y turista ta exigiendo diferente servicio y nos taxi por brinda esakinan.” Di mesun manera, Romero a señala cu esaki ta pa persona cu tin permiso solamente, pa personanan cu tin permiso di taxi cu ta otorga door di Minister di Transporte anterior, nan so por haci uzo di e aplicacion aki.

Esaki ta un servicio no dirigi pa turista so, e ta haci e trabou tambe di un taxista mas facil, segun Romero a comenta.

Romero a señala cu e beneficionan pa percura cu nos mesun hende tin e tipo di servicio aki, turistanan tin custumber pa uza esey tambe y asina mes tin diferente paisnan di Caribe cu ta haci uzo di dje y Aruba no por keda atras. Un turista ta sinti sigur pa motibo cu e taxi ta registra door di e pais Aruba y asina ey por ta sigur cu no ta subi riba un taxi ‘pirata’.

El a sigura cu esaki tambe lo contribui pa futuro pa elimina e mayoria di taxi pirata y si algun persona den comunidad ta sinti su mes cu no por core auto, e mes por bestel un taxi via e aplicacion aki, cu lo bay ta un taxi sigur y registra.

Tocante e preocupacion cu e taxistanan a duna di conoce dianan pasa den un conferencia di prensa, nan a bisa cu nan tabatin hopi tempo wardando pa un reunion cu Romero tocante e molestia cu ta existi den e grupo di taxistanan y cu e aplicacion ey no lo soluciona tur e problema cu nan tin; Bikker a comenta cu a traves di e aplicacion hopi problema lo keda afo y ayera atardi nan lo tabatin un reunion cu algun di nan.

Tambe el a sigura ta existi presion di otro aplicacion manera Uber of Lyft cu kier drenta Aruba pa via di e mercado cu tin akinan, pero ‘nos mester haci algo pa proteha nos taxistanan y esey ta algo cu nos ta haciendo awor’, Romero specifica.

Pa loke ta trata e dia cu e aplicacion lo drenta na vigor, Romero a bisa cu esaki tin su trayectorio y loke nan tin cla caba ta e informacion cu nan kier hinca aden, manera prijs, ruta, zona; pero e compania cu ta bay haci’e, te ainda gobierno no tin esey concreto. Tin diferente compania cu a duna nan presentacion, pero nan no a dicidi cua di nan tin miho beneficio.

Ora e aplicacion cuminsa traha na Aruba, Romero a duna di conoce cu lo traha principalmente cu placa cash, pa motibo cu online banking ta diferente – otro cos cu tin cu haci y duna sosten.