Benta di kreeft y gutu, hasta chucho ta sucediendo na Aruba sin ningun consecuencia. Tur ta animalnan cu ta riba e lista di proteccion, mara na e ley di Proteccion di Naturalesa y ta prohibi pa captura nan. Sinembargo, tin un pausa den e control di e ley y esaki ta algo delibera.

Kustwacht a haya notificacion di Minister di Transporte y Sector Primario Cris Romero pa no duna boet na piscadornan cu tin cierto pisca of animal di lama cu ta aparece riba e lista di proteccion, pa motibo cu segun un email cu a manda pa medio di Santa Rosa, lo tin un estudio tumando lugar riba e especienan specifico aki. E estudio ta pa determina si por saca e animalnan aki for di e lista di proteccion. E problema ta cu ni Santa Rosa, ni Departamento di Naturalesa y Medio Ambiente ta na altura di un investigacion asina.

E pausa riba implementacion di e ley di proteccion ta dirigi riba dos tipo di tribon martiu, dos tipo di djampou, e Atlantic Blue Fin tuna, gutu y kreeft.

Manera ta conoci, tin algun aña caba cu tin peticion pa saca e animalnan aki for di e lista di proteccion. Banda di prohibicion di piscamento cu harpun, piscadornan a argumenta cu e lista di e animalnan protehi, cu ta inclui kreeft ta bay mucho leu. Y a presenta nan argumentonan na Parlamento.

Gedoogbeleid ta pa pisca cu harpun

A logra kita e prohibicion di e piscamento cu harpun pa medio di un gedoogbeleid, un decreto di tolerancia. E discusion aki a bay asina leu te cu el a costa cabez di Marisol Lopez Tromp. Locual no a bin si, ta cambio den e lista di animal protehi. E ley ta un responsabilidad di Minister encarga cu Medio Ambiente, cu actualmente ta mr. Evelyn Wever Croes. Prome Minister Wever Croes a tuma e carteranan di entre otro Medio Ambiente y ta e Minister responsabel pa mantencion di e ley di Proteccion di Medio Ambiente, incluso e lista di animal protehi.

Y e mandatario encarga no a trece ningun cambio den e lista, asina leu cu ta conoci, loke ta significa cu formalmente kreeft, gutu y e otro especienan riba e lista ta keda prohibi pa saca di lama. Y e instancia encarga pa controla y implementa ley ta Kustwacht. Sinembargo tin un email, segun varios fuente, cu a bay pa Kustwacht pa no verbalisa piscadornan cu tin e piscanan den discusion, pendiente un investigacion.

Confusion

Bon Dia Aruba como tal a acerca Minister di Medio Ambiente, encarga cu e ley Proteccion di Naturalesa Sra. Evelyn Wever Croes, kende a bisa di no ta na altura di nada. Tambe a acerca Direccion Naturalesa y Medio Ambiente, DNM cu tampoco ta na altura di e decision. Es mas, ta e Direccion aki ta responsabel pa conseha Minister di Medio Ambiente riba e Ley di Proteccion di Naturalesa y DNM no ta na altura di ningun estudio.

Bon Dia Aruba tambe a tuma contacto cu Director di Santa Rosa, sra. Nathalie Maduro, kende apenas a bolbe trabou pa motibo di kebrante di salud. Sra. Maduro no tabata sa di e email y segun Biologo Marino Byron Boekhoudt encarga cu Centro di Pesca Hadicurari, ningun hende a pidi’e pa un conseho of decision, unicamente cu e tabata den un cadena di email cu tabata dirigi na Minister Romero. E no a specifica e tema di e cadena di email.

Den otro palabra, ta drenta un email pa Kustwacht pa pone e implementacion di e ley un banda, y hasta extende e pausa. Pero te asina leu cu Bon Dia Aruba por a conclui, no tabatin un decision di Conseho di Minister y e Minister encarga esta Minister Evelyn Wever Croes no tabata na altura di nada, apesar cu e email ta bisa cu e pausa di implementacion di e control riba e especienan specifico ta un decision di Conseho di Minister.

Mester remarca cu Kustwacht ta sigui haci su control riba e otro especienan riba e lista di proteccion y tambe si piscadonan cu ta uza harpun ta registra y tin permiso. Pero si Conseho di Minister ni e Minister encarga cu Medio Ambiente a duna instruccion pa stop e control riba piscamento di gutu, kreeft, y e otro piscanan menciona, e pregunta ta con esaki por. Bon Dia Aruba a tuma contacto cu vocero di Minister Cris Romero y te na ciere di nos edicion, no a haya un splicacion.

Tampoco a haya informacion kico ta e posicion di Minister di Husticia Andin Bikker kende tambe a boga pa e maneho di tolerancia pa uzo di harpun. E Minister a sigura durante e debatenan den Parlamento, cu Kustwacht lo sigui haci su trabou di controla y percura cu ta implementa e ley di Proteccion di Naturalesa.