For di aña pasae fundacion Movemento ta Bida a acerca Santa Rosa pa conseho y ayudo pa un proyecto destina pa nos grandinan,cu e meta pa stimula actividad fisico via e practica di Agricultura. Recientemente e Titular di e Cartera di Sector Primario, sr. Chris Romero, a reuni curepresentantenan di e Fundacion “Movemento ta Bida” y Santa Rosa, pa involucra su mes directamente den e bunita proyecto aki pa nos grandinan.
Santa Rosa a reuni cu Fundacion Movemento ta Bida y asina cuminsa encamina e proyecto, unda cu e prome paso tabata pa busca un tereno disponibel y aki a scoheCentro Sjabururi.
Despues a sigui reuni cu e fundacion pa discuti e maneranan mas factibel pa ehecuta e proyecto aki y con Santa Rosa lo por yuda, door di duna consehonan practico y tecnico pa logra ehecuta e plannan.
Minister Chris Romero a keda impresiona cu e embergadura di e proyecto aki, cual sigur lo ta un incentivo mas pa nos grandinan mantene nan mes ocupa den practicanan di agricultura, pero tambe pa comparti nan conocemento den e materia cu otro gruponan interesa den esaki. E intencion ta pa den futuro por tin mas area designa pa plantamento den diferente bario y cu nos grandinan por distrai nan mes haciendo esaki.
Por corda cu na aña 2019 Minister Romero a introduci e proyecto escolar “Hofi di Amistad”, cu e meta pa involucra nos muchanan den agricultura for di trempan. Y awor e proyecto aki di fundacion Movemento ta Bida, lo sirbicomo un aportemas pa sigui impulsa e cultura di plantamento na Aruba.
