Recientemente Minister di Transporte, Comunicacion y Sector Primario, sr. Chris Romero, a bishita Direccion di Asuntonan di Telecomunicacion (DTZ), pa asina mira personalmente e infrastructura nobo di ICT cu e departamento aki a haya.
Durante e bishita aki, director di DTZ, sr. Ludwig Jansen, a duna Romero un splicacion detaya di e infrastructura di ICT nobo cu su departamento a haya.
Manera ta conoci, DTZ ta un departamento cu durante decadanan no a haya su debido atencion for di e gobiernonan anterior. Romero a pone como un di su metanan inmediato pa modernisa DTZ, mirando cu e ta un departamento di importancia vital den e mundo moderno den cual nos ta bibando awendia.
Segun un comunicado di gobierno, pa por a modernisa DTZ optimalmenteg mester a haci un inversion di mas di 400 mil florin. Aki por menciona cu a reemplasa e servernan bieu, cu ta data aña 2000, pa servernan di aña 2019. Tambe a modernisa tur computer cu tabata opera riba e sistema Windows XP, pa computer ekipa cu Windows 10. E renobacion di e infrastructura di ICT aki ta haci posibel cu DTZ por digitalisa, automatisa y realisa proceduranan mas eficiente y cu ta cuadra cu e maneho y vision di Romero y su ministerio.
No solamente a dicidi di inverti den e infrastructura nobo di ICT, pero tambe a inverti den muebleria nobo pa DTZ, cual tampoco a wordo renoba den añanan. Por bisa cu e direccion di Asuntonan di Telecomunicacion di Aruba a pasa den un modernisacion completo.
Durante e recorido aki, sr. Juan Carrasquero, hefe di Departamento di permiso y finanzas di DTZ, a enfatisa riba e adelanto cu e infrastructura di ICT nobo ta nifica pa, entre otro, e eficiencia di e operacionnan diario di su departamento.
Finalmente sr. Sidney Tromp, hefe di Departamento Tecnico di DTZ, a duna un demostracion di locual e sistema nobo di grabacion di radio y television por haci. Tambe a mustra Romero e diferente aparatonan cu DTZ ta uza pa haci supervision y nan importancia pa cu control riba cumplimento di e leynan di telecomunicacion na Aruba.
Romero a keda sumamente satisfecho di mira e adelanto cu finalmente Gabinete Wever-Croes por a trece pa DTZ, despues cu e tabata un departamento practicamente den olvido durante e ultimo decadanan, e comunicado a finalisa.
