Ministerio Publico a recientemente cera e caso Avestrus contra e naamloze vennootschap Pristine Estates NV, sospechoso den e investigacion penal, pa medio di un transaccion di 1 miyon florin.

Pristine Estates NV tabata wordo sospecha di actieve omkoping. Opinion di OM ta cu tin suficiente prueba contra Pristine Estates NV y cu e hecho pa cual OM a dagvaard Pristine Estates NV por wordo comproba.

Considerando tur hecho y circunstancia, bao di cual e specificacion cu no tin partinan perhudica cu interesnan cu na cualkier forma lo por wordo daña na momento di un transaccion, OMta mira e transaccion menciona como e afdoening mas apropia pa Pristine Estates NV. Ora di yega na e transaccion a alavez laga conta cu e sospechoso Pristine Estates NV ta un rechtspersoon. Contra un rechtspersoon huez penal por impone solamente sancion financiero. E boet maximo cu un huez penal por impone pa e hecho aki ta Afl 100.000.

Ministerio Publico ta di opinion cu e suma total di e transaccion ta husto pa cu e hechonan y pa cu e rol specifico cu e NV tabatin den Avestrus. Tanto Ministerio Publico como Pristine Estates NV ta considera e transaccion aki un afdoening apropia di e caso penal, mirando tur e hechonan y circunstancianan.

Cu Pristine Estates NV a cera e transaccion aki no kiermen cu Pristine Estates NV ta admiti culpabilidad penal y tampoco cu e ta admiti di lo a ricibi algun benificio ilegalmente.

Ministerio Publico ta enfatiza cu e transaccion no tin influencia riba e procedura penal contra e otro sospechosonan den e caso.

Bon Dia Aruba a puntra minister di Husticia, Rocco Tjon si e tabata na altura di e comunicado, pa loke el a contesta cu OM si a inform’e cu lo emiti esaki. Bon Dia Aruba a puntra, den minister su maneho general di Husticia, minister ta aproba cu ta yega na acuerdonan asina pa evita corte? Tjon a contesta: “Un punto cardinal di nos maneho ta pa combati corupcion. Mi a menciona na hopi ocasion cu Ministerio Publico y Landsrecherche su presupuesto lo keda completamente intacto. Esaki pa nan por cumpli cu tur nan trabaonan, entre otro, den cuadro di combati corupcion. Esaki a conduci entre otro, cu ya caba Aruba a haya fondonan for di Hulanda pa ehecuta nos maneho den cuadro di combati corupcion.”

“Por ultimo, mi por bisa cu e ta keda na discrecion di OM con nan ta persigui un caso”, Tjon a agrega, “sea den un transactie (afdoening) of ta bay corte.”

Nota di redaccion:

E recado di prensa ta duna claridad di un banda y ta laga cierto pregunta habri. Si ta un persona legal ta esun cu a comete un delito, esey ta un constatacion cu cierto consecuencia. Un persona legal no por tene un pen y no por hiba conversacion pa su mes, por lo tanto tabatin persona(nan) natural cu a comete e delito representando e persona legal. Na promer lugar esey ta e director(nan) cu a hiba e negociacionnan na nomber di e compania. Por ta tambe cu nan a actua

riba instruccion di autoridad mas halto cu nan, manera un asamblea di accionista o un Ultimate Beneficial Owner. Ken nan ta y pakico no a cuminza caso contra e personan natural y ta papia solamente di e culpabilidad di e empresa, cu en berdad no ta pas den un cel na KIA. Of nos mester mira e asunto asina cu e personanan natural culpable ta keda ‘buiten schot’ pasobra e compania ta paga?