Traves di nan pintura muchanan ta expresa y siña tocante Aruba su Ley di Cacho. E honor ta toca e aña aki na minister di Husticia y Asuntonan Social Rocco Tjon, pa presenta e concurso di pinta y kleur 2022 na comunidad di Aruba, hustamente riba Dia Internacional di Cacho.

Manera ta conoci, Bruce Harms a bin ta encarga di e diseño di e formularionan di participacion cada aña y e aña aki no ta un excepcion, caminda atrobe el a destaca cu su arte. Pa e concurso e aña aki su persona a diseña un formulario di participacion di tres pagina. Pagina uno di e formulario ta e pagina di instruccion y ta contene e informacion necesario pa por participa, pagina dos ta contene e plachi cu e muchanan mester kleur segun nan propio imaginacion, y pagina tres ta designa pa e participantenan por demostra nan creatividad cu nan arte, esaki mester ta original y e borchi di trafico mester ilustra un of mas di e puntonan di nos Ley di Cacho. Ambos pagina mester wordo pinta door di e mucha mes, na color, y sin ayudo di un mayor.

E meta di e concurso di pinta y kleur “Ley di Cacho” 2022 ta pa sigui conscientisa comunidad, specialmente nos muchanan, tocante e cuido debido di nan mascota. Minister Tjon tambe ta convenci cu si nos cuminsa inculca e atencion debido di nos leynan den nos muchanan, den e caso aki, e Ley di Cacho, nos lo por garantisa un miho futuro pa locual ta trata doñonan di mascota responsabel cu ta respeta e ley, y alabes nan propio cachonan.

E fecha final pa entrega e formulario di participacion ta dia 22 di september 2022, y lo tin un regalito pa e ganadonan di cada klas, cual lo wordo entrega dia 4 di oktober 2022, Dierendag. Participacion ta gratis y ta habri pa tur muchanan di scol primario y scol basico (1e kleuter – 6e klas). Scolnan a ricibi e formulario completo caba via email pa nan mes por distribui esaki bou nan alumnonan. En caso cu no a ricibi e formulario di participacion na scol, por download esaki a traves di e pagina www.specialprojectsaruba.org tambe; tene cuenta cu mester entrega tur dos pagina di tarea pa por participa.

Minister Tjon, ta invita henter comunidad di Aruba pa stimula tur nos muchanan pa nan participa cu nan talento na e concurso di pinta y kleur 2022 pa asina un bes mas, e concurso aki por ta uno exitoso.