Minister Rocco Tjon: “Sociaal crisis plan sigur tabatin balor agrega y e alrededor di 33 proyectonan aki a sa di wordo continua”

Ayera den Parlamento di Aruba a tuma luga un reunion publico caminda Minister di Husticia y Asuntonan Social, Rocco Tjon, a duna splicacion tocante e acontecimentonan recien cu a tuma luga bao custodia policial y tambe a elabora ariba diferente aspecto- y proyectonan pa loke ta trata e parti social.

Diferente punto a wordo treci pa dilanti pa loke ta trata e parti di sociaal crisis plan. Parlamentario independiente Rycond Santos do Nacimento a remarca cu e problemanan social cu ta mester confronta cune awe ta resultado di hopi aña di negligencia y esey, Minister Tjon a indica, ta e motibo pakico a introduci sociaal crisis plan, pa por percura pa un inversion substancial pa mitiga locual cu ta wordo confronta cune awendia.

Minister Tjon a splica cu e inversionnan aki en total tabata consisti di alrededor di 33 proyecto cu na varios ocasion a wordo presenta na parlamento. E proyectonan aki, el a indica, ta trata proyectonan infrastructural cu gobierno a percura despues pa den e presupuesto regular esaki wordo acapara tambe pa fondonan necesario.

E proyectonan aki, el a agrega, ta trata tambe e cursonan y e parti di procesonan di trabao cu tambe a percura pa wordo incorpora den un forma structural den e procesonan di trabao di diferente servicio.

El a señala cu comentarionan cu a wordo treci pa dilanti door di algun parlamentario cu e inversionnan no tabata duradero, no ta cuadra pasobra e gran mayoria di e inversionnan aki tabata toca e parti di cursonan, procesonan di trabao, entre otro, y tur esaki nan ta tene cuenta cune ainda.

“Signs of saftey, Codigo di Proteccion, Collaborative Partnership cu aworaki ta algo structural den e prome liña di cuido cu Directie Sociale Zaken ta brinda, y di e forma ey a trata pa papia tambe di proyectonan duradero y p’esey nos a bin parlamento e momento cu sociaal crisis plan a termina,” el a remarca.

E mandatario a sigui splica cu ora cu a percura pa incorpora tur e proyectonan aki den e servicionan regular y pone placa disponibel tambe, e tempo ey a yam’e bao di e capa di Family Justice Center. Tabatin Family Justice Center como tal, pero nan a ordena tur e diferente proyectonan di sociaal crisis plan cu ta toca e parti prevencion, e parti curativo y metodonan di trabao bao di e proyecto aki pa garantisa su prolongacion.

“Di e forma ey sociaal crisis plan sigur tabatin balor agrega y e alrededor di 33 proyectonan aki a sa di wordo continua. Ta trata di bisa cu e no a funciona door di trece un caso specifico pa dilanti, ta trata di Cas Blenchi. A bin diferente momento den parlamento pa splica con a aloca e fondonan un biaha pa esaki por continua y tambe e responsabilidad di cada fundacion pa percura cu nan subsidieaanvraag pa esaki sucede pa di e forma ey e por ta duradero tambe,” el a agrega.

Minister Tjon a remarca cu e maneho ta basa riba e parti di prevencion. El a recorda cu na momento cu Gabinete Wever-Croes II a scoge pa pone e dos ministerionan aki hunto, husticia y asuntonan social, hopi critica a bin di parti di oposicion, a cuestiona e e composicion y a cuestiona pakico cuido di adiccion y GGZ tambe a cay bao di e ministerio aki.

El a subraya cu e motibo pakico a scoge esaki, tabata un decision tuma deliberadamente pa por papia di un acercamento holistico y pa por aborda e diferente retonan di un miho manera.

Pa loke ta e parti cu ta enfoca riba prevencion, Minister Tjon a indica cu tin diferente proyecto cu ta andando cu ta duna contenido, referiendo na e comentarionan di diferente parlamentario, mirando e necesidad pa e cuido y mas actividadnan den bario pa brinda e hobennan mas oportunidad.

El a señala cu tocante e metodonan di trabao, tin signs of safety, codigo di proteccion cu a wordo introduci, ambos ta sigui wordo amplia, codigo di proteccion conoce awo e toolkit tambe cu tur e profesionalnan, pa asina por garantisa durabilidad.

El a enfatisa cu tin algun investigacion cientifico cu a wordo referi na dje, entre otro uno di SKOA y diferente investigacionnan cientifico cu a wordo realisa pa Universidad di Aruba. Un di e recomendacionnan cu a bin di e investigacionnan aki, el a splica, ta pa percura pa tin e codigo di proteccion den tur e sectornan bon implementa y tin diferente campaña nacional tambe cu a wordo introduci contra di abuso en general.

Pa loke ta e proyecto di veilige barios, el a indica cu CEDE Aruba ta encarga cu esey caminda cu a restructura e financiamento y for di esaki a nace Barionan Unico tambe. Otro luna lo lansa e website di e iniciativa aki pa asina e por bira mas visibel pa tur ciudadano den e diferente barionan por wak specificamente kico ta wordo ofreci den nan bario.

Tocante evaluacionnan cu a tuma luga, el a remarca cu tin diferente evaluacion cu a tuma luga ariba e diferente metodonan di trabao y a base di esey tambe a bin cu un proyecto multisectoral y multidisciplinario pa por yega na e metodonan di trabao mas sincronisa pa brinda un miho cuido.

Pa e parti represivo, Minister Tjon a splica cu tin diferente inversion a tuma luga, specificamente den cuerpo policial, KIA y Stichting Reclassering, pa duna atencion na e parti aki y pa percura cu un bes algo sucede, por percura cu e investigacionnan ta bon y brinda mesun momento tambe e cuido na esnan cu tin mester di esaki.

El a agrega cu tin diferente plataforma di comunicacion cu a wordo introduci y den e diferente plataformanan aki tur e profesionalnan ta bin hunto pa asina garantisa e acercamento holistico. Tambe tin diferente comision cu a wordo instala cu ta toca tur e diferente puntonan cu a wordo treci pa dilanti, entre otro derechonan di mucha, lantamento di mucha y tambe e parti di famia.

Por ultimo un punto cu a wordo treci pa dilanti ta e punto di cifra y data. E mandatario a remarca cu ta hopi importante, si kier duna contenido na data driven policy, pa percura pa basa e maneho ariba e investigacionnan cientifico.

“Un di e cosnan cu nos a haci mesora ta pa percura cu tin diferente investigacionnan cientifico tuma luga pa a base di e resultado aki nos por adapta maneho si esey ta necesario. Actualmente tin por lo menos cinco investigacion cientifico, algun cu a caba di wordo termina y algun cu ainda ta den e fase di finalisacion. Un bes cu tur e data aki wordo compila nos lo us’e tambe pa adapta maneho caminda cu esaki ta necesario,” el a señala.