Diahuebs ultimo a tuma luga dos diferente reunion, caminda a trata prome e tema di rijbewijs sigui pa un otro reunion cu a toca e tema di transformacion di Scol di Polis pa un Academia di Husticia y Siguridad.
Minister di Husticia y Asuntonan Social, señor Rocco Tjon a reuni prome cu e “Vereniging Rijscholen Aruba” (VRA), DWJZ, KPA y representante di Ministerio di Husticia y Asuntonan Social pa cuminsa den cuadro di e comision cu a wordo lanta pa elimina tur trabou cu tin di haber cu rijbewijs for di Cuerpo Policial.
E meta final di e comision aki ta pa duna conseho y presenta un plan di maneho pa con por trece miho contenido na henter e proceso cu tin di haber cu rijbewijs y rij-examens. Segun Minister Rocco Tjon e plan ta pa yega na un solucion duradero. E mandatario a sigui splica cu den Reino henter, e parti cu ta toca rijbewijs no ta forma parti mas di e diferente Cuerponan di Polis y e vision ey su ministerio tin pa Aruba tambe.
Pa e segundo reunion a toca turno na e comision di conseho encarga cu e transformacion di Scol di Polis den un Academia di Husticia y Siguridad. E participantenan di e comision aki ta consisti di expertonan di Ministerio di Husticia y Asuntonan Social riba tereno financiero, representantenan di DWJZ y DRH como tambe Cuerpo Policial. Durante e reunion aki a repasa ful e historia, y a deduci cu esaki ta un idea cu a bin dilanti desde aña 2015 pa asina por brinda un miho calidad di enseñansa na henter e cadena hudicial, pero tambe na e sectornan semi-publico y priva.
Segun e mandatario, palabracionnan a wordo haci pa por yega na un plan di maneho como tambe un producto legislativo di con e transformacion aki mester tuma luga.
Unabes cu logra esaki, e lo nifica un logro den ampliacion di carera pa tur esnan cu ta traha den husticia. Ademas di esaki, tin posibilidad di atrae ekiponan y departamentonan di afo pa bin sigui cursonan y enseñansa na Aruba. E intencion ta pa haci esaki den diferente fase y tin como meta pa tin un concepto na mesa pa fin di aña pa wak con por sigui amplia esaki.
Por ultimo Minister Rocco Tjon a duna di conoce cu pa ambos proyecto ta importante pa tene na cuenta e aspectonan financiero, organisatorio y derechonan di personal.
