Recientemente, Minister di Husticia y Asuntonan Social Sr. Rocco Tjon a reuni cu e ekipo cu lo bay keda encarga pa forma un “Family Justice Center”.
Pa hopi tempo caba a papia di e proyecto aki, y awo a yega e momento pa haci esaki un realidad, esaki ta nifica cu na momento cu tin un caso di abuso sexual, lo bay trece tur expertisio cu ta necesario hunto pa asina por conduci un investigacion mucho mas solido.
Minister Tjon a enfatisa cu esaki ta un paso hopi importante, caminda cu si tur cos cana segun planifica, e “Family Justice Center” lo bira un realidad comienso di otro aña y pa e motibo ey tambe Ministerio di Husticia y Asuntonan Social, pero sigur tambe Gobierno den su totalidad a boga pa e proyecto aki den presupuesto 2022.
Den anticipacion di esaki, mester bisa cu na comienso di December, specificamente dianan 8, 9 y 10 di December ya caba lo bay tin e prome curso cu lo bay tuma lugar, un curso specificamente dedica pa percura cu tur e profesionalnan wordo certfica den e “studioverhoor” di e mucha, esaki ta bay nifica cu cada recherche cu ta traha na Cuerpo Policial den e departamento di “Jeugd en Zeden Politie” ta bay ta certifica.
Ademas di esaki, psicologonan cu ta forma parti di Ministerio Publico, e “Zedenofficier”, pero tambe Voogdijraad, Orthopedagogische Centrum y Departamento di Asuntonan Social lo bay haya e oportunidad pa sigui e curso, pues esaki tambe ta un paso hopi importante den henter e proceso aki. Lo bay percura tambe pa cumpra tur e materialnan necesario pa e “studioverhoor ruimte”.
Minister Tjon a expresa cu Ministerio di Husticia y Asuntonan Social ta sumamente contento cu e progreso cu a wordo presenta door di e ekipo dedica aki y ta sigur cu dentro di poco no solamente e parti di educacion y e “studioverhoor ruimte” lo bay bira un realidad, pero tambe e demas protocolnan cu mester wordo firma entre e socionan pa asina por brinda un miho servicio na tur e victimanan di casonan di abuso sexual pero tambe casonan caminda tin e dimension di violencia.
