Recientemente, Minister di Husticia y Asuntonan Social Sr. Rocco Tjon tabata presente na Bureau Rampenbestrijding Aruba (BRA), caminda a reuni cu practicamente tur e departamentonan hudicial cu tin un rol hopi importante den garantisa siguridad na nos frontera.

Durante e reunion aki, a toca diferente topiconan, entre otro a toca e reapertura di nos frontera cu Venezuela, y a toca tambe varios proyectonan cu ta andando pa eleva e siguridad na nos frontera.

Den cuadro di e reapertura di frontera cu Venezuela, mester bisa cu pa fin di luna lo bay tin e prome reunion tecnico caminda e puntonan ta bay ser discuti, si eventualmente tuma e decision pa habri e frontera back cu Venezuela. Manera ta conoci, e punto di salida di Gobierno di Aruba pa cu e tematica aki ta cu esaki lo mester sosode gradualmente na un manera hopi responsabel. Cada departamento a duna un update pa loke ta e puntonan cu nan mester tin delinea prome cu nan yega na habri e frontera.

Segun minister Tjon, e reunion tabata uno sumamente informativo, caminda a toca tambe e diferente proyectonan cu ta bay ser ehecuta e aña aki den cuadro di e landspakket. Tin cu menciona cu actualmente tin miyones di florin disponibel pa por percura pa e procesonan ser restructura, y material ser cumpra pa tur e personal cu ta traha den e diferente departamentonan aki.

Tambe, tin espacio pa inverti den proyectonan infrastructural. Banda di esaki, a palabra cu lo sigui reuni un bes pa luna na Bureau Rampenbestrijding Aruba (BRA) pa di e forma aki por monitorea e avancenan mas di serca pa cu e proyectonan aki. Varios proyecto a ser aproba caba pa loke ta programanan tecnologico, asina por cu danki na esaki e servicio pa cu clientenan di Inmigracion Aruba ta bay ta mucho mas miho. Na mes momento, lo bay por monitorea e problematica di “overstayers” na un forma mucho mas eficiente y eficaz.

Por ultimo, e mandatario a expresa cu e ta satisfecho cu e noticia cu Kustwacht ta bay sigui expande nan ekipo y yama bon bini na mas personal. Esaki lo percura pa e controlnan maritimo por ta mucho mas eficiente y eficaz, cual ta sumamente importante, mirando e ultimo desaroyonan caminda mas y mas lanchanan ta ser intercepta.