Durante conferencia di prensa dialuna mainta Minister di Husticia y Asuntonan Social, Sr. Rocco Tjon, a contesta algun pregunta unda cu el a elabora ariba diferente topiconan, entre otro e situacion actual cu ilegalnan na nos pais y plataforma di reino.

Ministerio di Husticia ta desaroyando maneho di cuerpo policial, un pregunta di prensa a toca e parti di infrastructura, si esaki tambe lo mira desaroyo y mehoracion. Minister Tjon a indica cu manera wordo anuncia caba diferente departamentonan di husticia lo muda pa e edificio di ex-Codemsa. E motibo pa esaki el a splica ta cu lo consolida e diferente huurnan cu tin actualmente y asina yega na miho condicionnan di trabou pa e personal mes.

E edificio lo wordo renoba y lo ta completamente nobo y obviamente, Minister a señala, den e presupuesto lo tene cuenta tambe cu e parti di mantencion. Pa loke ta e otro wardanan, specificamente warda di Santa Cruz y di Shaba el a bisa cu e edificionan cu ta den bon condicion ainda y mantencion ta tuma luga.

Tjon a continua y a contesta pregunta di prensa ariba bureau slachtofferhulp. El splica cu antes, hopi aña atras, bureau slachtofferhulp tabata cay bao di Directie Sociale Zaken y algun aña atras a tuma e decision pa cambia esaki y aworaki ta cay bao di cuerpo policial di Aruba. El a enfatisa cu mirando e preocupacion cu tin den full e veld, e ta kere a yega tempo pa explora e posibilidadnan pa yega na un departamento como tal di bureau slachtofferhulp cu por brinda e asistencia na victimanan y na famia di victimanan.

El a remarca cu e ta wak un rol hopi importante interno tambe pa e loke ta e futuro departamento aki. “Si nos wak e cadena hudicial, e cadena social tambe, mi ta kere bureau slachtofferhulp lo por brinda ayudo tambe na trahadonan mes den e diferente departamentonan aki”, el a bisa.

“Ya caba tin diferente documento na departamento di recurso humano mes cu ta splica kico lo ta e miho forma pa duna contenido na un departamento asina. Mi ta kere analisis mester wordo haci pa wak kico e impacto financiero lo ta, pero cu un departamento asina ta di balor agrega sigur cu si y mi lo sostene tur idea y peticionnan cu bin pa logra cristalisa esaki”, el a agrega.

Na diferente wardanan di polis tin hopi auto cu tin añanan para eynan sin cu nada ta wordo haci. Pregunta tocante e futuro di autonan aki tambe a bin dilanti y Minister Tjon a splica cu tin un comision ta trahando riba esaki y tin dos decision cu lo por wordo tuma. Uno ta cu lo destrui e autonan y cu e cambio di maneho e entradanan aki ta bin pa pais Aruba mes.

E otro decision cu el a menciona ta cu lo por tin un destaho caminda lo bende e autonan aki despues di encamina full e procedura. El a splica cu tin un experto den e comision aki cu a balora tur e autonan aki y segun indica e lo cumbini pais Aruba pa haci un destaho y segun el a señala, nan ta preparando pa e proceso aki.

Pa loke ta trata e funcion di pais Aruba den e plataforma di reino, Minister Tjon a splica cu e plataforma aki ya tabata existi y Aruba ta forma parti di dje. Den e vierlande overleg diferente topiconan pa loke ta trata husticia ta wordo trata, pero personalmente, el a indica, hopi biaha ora ta papia di husticia, particularmente ora ta papia di combati criminalidad semper ta toca solamente e parti di prevencion, e parti di conduci investigacionnan y hopi biaha ta lubida e proceso di “bedrijfsvoering” cu ta practicamente complementa e procesonan manera prevencion, combatimento di criminalidad y investigacion.

“Pa e motibo ey esey tambe ta un punto cu ta bay haya atencion y bo tin un plataforma entre tur e diferente hefenan pa loke ta e parti di bedrijfsvoering den reino y nos ta bay haci echt uso aworaki di e plataforma ey tambe pa nos por asisti e coleganan y cuerpo policial den e caso aki miho pa loke ta e parti di bedrijfsvoering”, el a bisa.

El a sigui splica cu topiconan manera uniform, descanso, materialnan cu e tin mester, manera entre otro e sistemanan digital, tur esey tin di haci cu “bedrijfsvoering”.

“Si bo bedrijfsvoering no ta cana manera mester ta, obviamente bo no por adkiri tur e materialnan aki cu bo tin mester pa bo polisnan. Mi ta kere ‘kinan tin hopi punto cu nos por mehora y di parti di ministerio tambe nos tin bon comunicacion cu cuerpo policial riba e topico specifico aki y mi ta kere e ta na su luga pa busca asistencia tecnico tambe aworaki pa nos por echt desaroya e punto aki y di e forma ey tambe bo ta bay kita tur e puntonan di frustracion cerca e coleganan cu mester haci e trabou”, el a agrega.

Un situacion cu constantemente ta hala atencion di comunidad, ta e situacion cu ilegalnan na Aruba. Pregunta haci pa miembro di prensa ta indica cu personanan cu ta cera na Guarda Nos Costa ta keha di e condicionnan cu nan ta den dje. Minister Tjon a contesta cu e situacion aki ta keda un reto, sinembargo e no ta un responsabilidad di Gobierno so y ta un responsabilidad di esunnan cu ta wordo cera tambe.

El a enfatisa cu Gobierno di Aruba a inverti hopi placa den e condicionnan pa mehora e facilidadnan y a informa cu e luna aki pa comienso di otro luna tin dos proyecto grandi specificamente pa “huis van bewaring y FOL” cu ta bay cuminsa y asina nan ta bolbe inverti den e facilidadnan aki pa sigui mehora nan.

Minister a menciona tambe, manera ta conoci, nan a firma un convenio cu Cruz Cora pa nan tin acceso constante na e facilidadnan. Algun siman atras tambe Amnesty International tambe tabata na Aruba y el a señala cu Ministerio di Husticia a duna tur cooperacion pa nan haya un recorido hunto cu e director actual di Guarda Nos Costa pa asina nan mes por wak e condicionnan

“Den tur transparencia nos kier mustra locual nos ta haci y tur e esfuersonan tambe cu Gobierno ta haciendo pa keda mehora e condicionnan. Semper ta bay kehonan, pero ta importante cu e kehonan cu drenta nos atende nan na un manera serio y responsabel pa na prome luga wak si e kehonan aki tin validez y si nan tin validez obviamente pa nos percura pa mehora e puntonan di preocupacion”, el a expresa.

Pa loke ta e situacion di entrada di botonan na Sero Colorado, Minister Tjon a bisa cu e problema ey ta keda un reto pero pa e motibo ey nan tin e plataforma strategico, “strategisch grens overleg”, caminda tur departamento cu ta importante pa percura cu tin seguridad na nos frontera ta bin hunto. Den e plataforma strategico aki, el a splica, diferente palabracionnan ta wordo haci, entre otro pa percura cu e radar kamer constantemente tin hende di dje pa ora señala algo tin hende pa actua riba dje y tambe tin palabracionnan pa e procesonan di e departamentonan ta miho delinea riba otro. Tin e ekipo cu ta riba caya tambe cu ta percura tambe cu na momento cu tin informacion nan por actua, bay na e sitio y captura e personanan cu ta trata di drenta nos pais.

“Nos ta aworaki asina leu cu ta bay firma un convenio entre polis maritimo y kustwacht pa asina e cooperacion entre mas tanto e dos departamentonan aki cu ta haci e controlnan maritimo por wordo hancra y traha miho cu otro”, el a informa.