Minister di Husticia y Asuntonan Social Sr. Rocco Tjon a reuni cu “Europees Comité voor de Preventie van Foltering en Onmenselijke of Wrede Bestraffing of Behandeling” (CPT), un comision internacional cu ta audit centronan di detencion.
Durante nan bishita na Aruba, nan a bishita Korrektie Instituut Aruba (KIA), diferente wardanan di Polis como tambe Guarda nos Costa (GNC) pa asina mira e situacion actual. Durante e bishitanan aki, nan a sinta y dialoga cu tur e profesionalnan cu ta traha na e diferente departamentonan aki. Durante e reunion cu a tuma luga despues di nan bishita, a sinta na mesa pa asina brinda nan recomendacionnan. Banda di esaki, nan a tene diferente dialogonan cu e detenidonan, pa asina haya mas informacion tocante varios topico.
E comision CPT ta audit e centronan di detencion riba diferente aspecto, manera infrastructura, higiena y e trato cu e detenidonan ta haya door di e profesionalnan cu ta traha na e centronan di detencion. Dentro di poco lo ricibi e prome rapport preliminario di e bishita aki, cu cada punto detaya.
Durante e reunion aki, varios punto interesante a wordo treci padilanti, caminda algun di e recomendacionnan cu a wordo menciona, no lo tin un costo mara na dje pa por implementa esakinan, manera e adaptacion den maneho y cierto reglanan cu tin na vigor actualmente. Segun Minister Tjon, e puntonan aki lo haya e debido atencion lo mas pronto posibel, pa asina por cuminsa traha riba e adaptacionnan aki. Banda di esaki, a trece demas puntonan padilanti, cu lo haya e atencion necesario a largo plaso, unabes logra aloca e fondonan necesario, pa por atende cu esaki. Segun e mandatario, e comision CPT a keda sumamente satisfecho cu e cooperacion cu nan a ricibi di parti di e delegacion di Aruba, mirando cu nan a ricibi e debido acceso na cada luga, documento y informacion cu nan a pidi pe.
Minister Tjon a indica cu ta reconoce e diferente retonan cu tin actualmente na Aruba, por ehempel cu nos Instituto Coreccional, sinembargo, e tipo di auditnan aki di CPT lo yuda crea mas comprension di nos situacion actual na Aruba, cual por yuda pa ricibi e permiso di Hulanda pa asina yega na e fondonan necesario pa por trece e cambionan necesario. Actualmente, ta den espera di e rapport cu e comision lo entrega pa asina por cuminsa efectua e recomendacionnan.
