Durante rueda di prensa di Gobierno di Aruba, Minister di Husticia y Asuntonan Social Sr. Rocco Tjon, a elabora riba e sieguridad na nos frontera, como resultado di e sucedido den fin di siman, caminda a intercepta un boto local cu substancianan ilicito y arma di candela ilegal.
Manera ta conoci diadomingo mainta, Kustwacht Aruba a intercepta un boto local, durante e accion aki, nan a constata un cantidad basta grandi di droga y arma di candela ilegal. E sucedido aki ta accentua e importancia cu mester tin pa e topico aki. Pa e motibo aki, Ministerio di Husticia y Asuntonan Social ta tene reunionnan strategico cu cada departamento cu ta encarga cu siguridad na nos frontera. Ta trata di e “strategisch grens overleg” caminda ta haci uso di e reunionnan aki pa delinea procesonan.
E caso specifico aki ta demostra un bes mas e importancia di tecnologia pa pais Aruba. Bisando esaki, Minister Tjon a anuncia cu e di tercer radar ya caba a wordo adkiri, y lo wordo manda pa Aruba dentro di poco, pa asina por tin un radar extra. Na mes momento, ta trahando riba proceduranan pa por adkiri un di cuater radar pa asina por percura cu mas y mas e siguridad na nos frontera por wordo eleva.
Banda di esaki, tin diferente proyectonan andando pa loke ta e “plan van aanpak” di e “versterking grensveiligheid” den colaboracion cu Hulanda, caminda no ta enfoca solamente riba e parti tecnologico pero tambe ta enfoca riba e parti di procesonan y investigacionnan, cual ta un parti hopi importante.
Por ultimo, e mandatario a splica cu e caso specifico aki ta den man di e unidad di crimen organisa caba, pa asina e investigacion por cana su caminda segun proceduranan stipula y asina determina kico ta e netwerk akinan na Aruba cu ta facilita esnan cu ta comete e acto aki. Pues, den cuadro di e investigacion cu ta andando, minister Tjon a manda palabranan di elogio na henter e personal di Kustwacht cu a percura pa esaki por tawata posibel.
