Siman pasa, Minister di Husticia y Asuntonan Social Sr. Rocco Tjon a hiba palabra na e finalisacion di e prome parti di e renobacionnan di e centro na Sero Colorado cu ta forma parti di Stichting HUNTO. Esaki ta marca un paso significativo den nos compromiso como comunidad pa adresa algun di e retonan social y di salud cu nos ta enfrenta, esta adiccion y salud mental.
Segun un comunicado di gobierno, e ceremonia no tabata solamente pa celebra e renobacion di e centro importante aki, pero tambe pa reafirma un bes mas nos compromiso y responsabilidad colectivo pa inverti den futuro di nos comunidad. E trabaonan cu ta ser eherci aki, no ta solamente pa e individuonan, pero tambe pa famianan y henter nos sociedad. Bisando esaki, a ilustra e tres perspectivanan, esta perspectiva di comunidad, di famia y di e individuo, pa asina duna un bista di con esaki ta mustra.
Den cuadro di e perspectiva di comunidad, tin cu bisa cu adiccion y retonan di salud mental no ta sucede den isolacion; nan ta sucede den nos barionan, scolnan y luganan di trabao, afectando nos tur di un manera of otro. Nos comunidad ta mesun fuerte cu su miembronan di mas vulnerabel. Na momento cu nos inverti den cuido di adiccion y sosten pa salud mental, nos ta invertiendo tambe den salud, seguridad y futuro prosperidad di henter nos sociedad.
Aki tin cu pensa riba e hobennan cu kisas ta luchando cu uzo di substancianan ilicito, sin e apoyo corecto, nan caminda por hiba nan leu di educacion, empleo y participacion positivo den nos comunidad. Sinembargo, cu intervencion y cuido eficiente, manera e servicionan cu Stichting HUNTO tin como obhetivo pa brinda, a traves di e renobacion di Centro Colorado, nos por yuda guianan bek na recuperacion y reintegracion. Esaki no ta solamente beneficioso pa nan, pero ta fortalece tambe nos comunidad.
Pa loke ta e perspectiva di e famia, adiccion y retonan di salud mental hopi biaha ta trece dolor y disturbio den bida di e miembronan di famia. Mayornan, rumannan y esnan cu ta stima e individuonan aki ta testigo di e lucha di nan ser keri, hopi biaha sintiendo nan mes impotente door di no por yuda nan. Pa nan, sa cu tin un fundacion manera Stichting HUNTO cu ta ofrece speransa, guia y sosten concreto por cambia tur cos.
Famianan ta e pilar di nos comunidad. Ora un miembro di famia ta sufri, e famia completo ta sinti e tension aki. Door di inverti den cuido di adiccion y servicio di salud mental, nos no ta solamente sosteniendo e individuo, nos ta sosteniendo tambe cada miembro di famia cu ta stima y cuida di nan. Nos ta duna famianan e hermentnan cu nan mester pa yuda nan sernan keri cura y na mes momento pa nan tambe sana nan mes. Imagina un famia cu sa cu nan yiu ta den bon man por tin un tiki trankilidad. Imagina un mayor cu haya e recursonan y sosten corecto, por haya speransa caminda antes tabata tin solamente decepcion.
Finalmente, laga nos no lubida e perspectiva di e individuo mes cu ta luchando cu su adiccion. Adiccion y retonan di salud mental ta bay man den man y ta lucha nan sumamente personal y profundo. Esakinan hopi biaha ta wordo marca pa sentimientonan di isolacion, berguensa y desesperacion. Nos deber moral ta pa garantisa cu individuonan cu ta enfrenta e retonan aki por ricibi empatia, comprension y un sistema di apoyo integral.
Inverti den cuido di adiccion y servicionan di salud mental nifica inverti den dignidad y potencial di cada ser humano. E ta nifica reconoce cu tur hende, sin tene cuenta cu nan pasado of e retonan cu nan ta enfrentando, tin e derecho pa recupera, reconstrui nan bida y prospera. Stichting HUNTO, cu e renobacion di Centro Colorado y e clinica na Dakota, ta representa e compromiso cu e vision aki: pa mira cada individuo, no pa e retonan cu nan ta enfrenta, pero pa wak nan pa ken nan ta, pa nan potencial y e balor unico cu cada un tin den nos comunidad.
E renobacion ta nifica cu a amplia e cambernan pa cliente, aworaki 40 cliente por wordo ubica na e centro renoba. Banda di esaki, lo bay tin un seccion dedica solamente pa hende muhe, y tin profesionalnan cu ta guianan y brinda curso na cada un. Banda di e parti medico y emocional, tin actividadnan cu ta enfoca riba nan desaroyo a traves di trahadonan social, instructornan y mas.
Por ultimo, e trabao cu nos ta haci awe, pues e inversion cu nos ta hinca den servicionan manera esaki, lo tin un impacto duradero, hopi mas leu cu nos por mira na e momentonan aki. Nos ta construyendo un comunidad cu ta uni, cu ta lanta su miembronan di mas vulnerabel y cu ta reconoce e responsabilidad cu hunto nos tin pa bienestar di cada un di nos.
