ORANJESTAD – Minister di Asuntonan Economico Richard Arends ta reacciona riba e carta di Dienst Telecommunicatie Zaken (DTZ) riba e maneho di programa politico na radio stacion. E carta aki no a cay den hopi bon tera pa algun hende den comunidad y algun politico kende mesora a clasifica esaki como un tipo di censura.
Segun minister Arends, e carta aki ta simplemente parti di protocol.

“Mi tambe ta conoci cu tipo di cartanan asina cu ta sali cada ora cu tin un eleccion. No ta nada otro cu nan ta cuminsa efectua reglamento di politieke zendtijd.
E ta specificamente pa por regula y duna tur partido politico un chens igual pa por saca nan mensahe y duna nan opinion.” E ta algo stipula den ley y pues no ta nada nobo di DTZ segun e mandatario ta laga sa. Ta e mesun cartanan cu ta sali na tur eleccion pero e biaha aki esun aki tin poco mas di elaboracion riba kico precisamente e articulonan di ley cu nan ta basa na dje.

Ley anticua
Minister Arends ta reconoce cu hopi di e leynan cu nos tin na Aruba ta anticua, incluyendo esun di telecomunicacion. “Pero nan ta e leynan existente sin importa di nos opinion si ta husto of anticua si of no. E ta e reglanan cu nos tin cu mantene na dje pa un bon ordo di un periodo electoral.”
E mandatario ta laga sa cu nunca esaki tabata un problema. Segun e ta splica Bon Dia, e ley ta splica en principio cu den temporada di eleccion, e ta conta pa e partidonan cu ta representa den parlamento. Despues cu e agrupacionnan politico pasa e drempel y cu nan haya aprobacion pa participa den eleccion, nan ta wordo considera pa e ley aki como un partido politico.

Licencia
Minister Arends ta bisa cu tin control di peticion pa licencia (pa haya un frecuencia di radio y television) regularmente. E ministerio ta ricibi reportahenan di DTZ riba ken ta cumpli cu nan y ken no. DTZ ta canando su procedura pa logra un cobransa segun e mandatario. Te aworaki tur radio ta casi up to date pa loke ta trata esey cu excepcion di uno, cual e no a menciona. “Bo ta haya bo licencia despues cu bo a paga. Tur cu tin licencia ta wordo cobra y a paga, cu excepcion di un cu ta den aire pero nos ta den discusion cu nan. No ta nada alarmante. E ultimo añanan nos a update e administracion di DTZ basta pa loke ta trata e outstandings.”

Bon Dia Aruba a tuma contacto cu DTZ pa un comentario pero no a logra haya esaki ainda.