Gobierno no a logra entrega e concepto di ley di presupuesto 2018 den parlamento dia 1 di september, manera constitucion ta prescribi. Minister di Financia, Angel Bermudez a informa parlamento cu presupuesto ta den su recta final pero lo entrega despues eleccion.
Asina nan kier duna espacio na e gobierno nobo pa inclui loke e kier inclui den su maneho, e ta motiva.
E mandatario a laga sa cu nan a tene cuenta cu dos aspecto, un ta eleccion cu ta na porta. Pero tambe cu normanan a base di ley CAft bou encargo di colegio di supervision CA. Ya cu mester tene cuenta cu e diferente normanan aki unda tin limite pa e presupuesto.
E tarea no ta uno facil, e minister ta expresa. E ta premira si cu a base di e norma aki pa otro aña gobierno mester yega cu un presupuesto cu un saldo positivo di alrededor medio porciento.
E aña aki e meta ta cu mester yega na un deficit cu no ta mas grandi cu 0,5% di nos GDP. Esaki kiermen cu entre e aña aki y otro aña gobierno tin cu bolter e deficit di medio porciento den un surplus di mas di medio porciento, pues 1% di diferencia.
Eleccion: ‘temporada di pidimento’
Sinembargo e mandatario ta wak cu den eleccion tin asina tanto proposicion cu nos por scucha. E partidonan den campaña ta bisa entre otro cu mester bin mas polis, mas maestro, mas duanero, mas personal na KIA. Pues e ta haya cu den eleccion nos ta den un temporada di pidi. “Tur hende ta pidi.”
Considerando e aspecto aki, e mandatario a indica cu nos mester tene cuenta cu nos recurso financiero ta limita den sentido cu mester tene cuenta y cumpli cu e normanan cu a keda stipula bou e supervision di CAft.
Aunke e no ta haya cu e diferencia ta grandi si e presupuesto ta wordo entrega ya sea prome of despues di eleccion. Pero e parlamento nobo cu lo wordo forma despues di eleccion lo tin cu trata e presupuesto 2018. Pero como un argumento adicional, e mandatario ta haya cu ta decente cu e gobierno nobo cual cu ta cu sinta despues di eleccion, mester tin e espacio den e presupuesto pa hinca aden loke e kier inclui como parti di su maneho.
Esaki no ta prome biaha cu un gobierno ta duna e motivacion aki pa entrega e presupuesto laat den aña di eleccion mientrastanto esaki ta contra nos constitucion.
Reduccion di 50 miyon riba gasto
Segun e mandatario mester reduci gastonan cu 50 miyon florin pa por cumpli cu e exigencianan di e normanan. “E ora ey ma bisa cu mi no ta bay yena presupuesto cu tur sorto di iniciativa di maneho pa otro aña. Pero laga e espacio ey pa e gobierno nobo cu lo sinta despues di eleccion.” E ta haya cu esaki ta un forma prudente pa e gobierno nobo, tin e espacio cu nan por hinca den e presupuesto di 2018 e parti di maneho cu nan kier yega na dje.
Minister Bermudez ta haya cu nan tin cu traha totalmente un otro forma di presupuesto basa ariba lineanan grandi y cifranan den totalidad. Esaki ta nifica l cambio grandi pa departamento di Financia. P’esey e mandatario ta spera cu e siman aki e por haya e ultimo concepto di e presupuesto pa asina defini e ley aki den conseho di minister pa despues entreg’e na parlamento.
E cambionan den presupuesto y con ta yega na cifranan ta algo cu pa añanan Algemene Rekenkamer ta consehando e gobiernonan. Sinembargo niun a cumpli cu e trabou di cambio grandi y parlamento como organo di control tampoco ta pone mucho presion riba esaki.
