ORANJESTAD – Ayera durante un conferencia di prensa di prome minister Evelyn Wever-Croes, el a splica con ta bayendo e situacion cu e pais bisiña Venezuela y e situacion di refineria. El a expresa cu e situacion ta sigui igual, e frontera ta sigui cera, e vuelonan disponibel den e momentonan aki ta pa esunnan cu tin paspoort Hulandes cu lo kier sali di e pais, of esunnan cu tin paspoort Venezolano cu lo kier bolbe nan pais.
Pa loke ta trata e refineria, prome minister a duna di conoce cu e siman aki e tabatin un combersacion telefonico cu presidente di parlamento Venezolano, sr. Juan Guaido, tocante e situacion di e refineria y e situacion cu e pais tin actualmente.
Guaido a bisa Wever-Croes cu loke ta trata e tema di refineria, el a sigura cu pa nan esey tin un papel hopi strategico, y cu Guaido ta trahando hunto cu su team pa por bin cu claridad den e situacion aki.
Wever-Croes a sigura cu Guaido a bisa cu nan no tin control di e structura di e compania, y esey ta haci e caminda mas dificil. Pa loke ta trata e negociacionnan di e refineria ta andando entre e partidonan, entre nan PDVSA Holding cu ta e compania madre, y autoridad Mericano, cu a pone e sancion; y prome minister a sigura cu ‘esaki ta un tereno sumamente dificil’.
Tambe a comenta cu e ‘License 7A’ a ser aproba caba dos siman pasa, esey ta permiti cu e fondonan por wordo transferi pa e fase dos cu a wordo finalisa. Sinembargo, PDVSA no ta coopera cu esaki y tin su punto di bista riba dje, Wever-Croes a señala.
Na mesun manera el a bisa cu e placa no por yega Aruba, y pa cada biaha cu ta warda, ta haci mas dificil; cu e situacion lo bay bira pio y nan ta actuando di mala fe, pa motibo cu nan a pidi pa drenta den e triangulo aki di discusion. El a sigura cu a haci esaki pa e trahadonan, cu ta na prome luga.
Wever-Croes a afirma cu na e momentonan aki, gobierno ta planeando loke nan ta yama un ‘Joint Visit’ di Aruba y Corsou hunto pa Washington pronto, pa nan combersa riba e tema aki cu autoridad Mericano, pero e fecha ainda no ta confirma.
El a confirma cu mas reunion lo bay tuma luga, ‘a pesar cu e chens cada biaha ta birando mas dificil, nos ta sigui positivo’. Wever-Croes a afirma cu e trahadonan cu a perde nan trabou, den fase dos lo por sigui cu nan trabou si e placa t’ey, y p’esey el a bisa cu nan ta lucha p’e.
En cuanto e fase tres, Wever-Croes a expresa cu ainda no tin ningun claridad riba esaki. “Nos ta keda positivo, pero tambe nos ta realista. Nos ta haci tur loke nos por, pero e situacion ta mustra hopi scur”.
Di mesun manera, nan como gobierno di coalicion tambe lo bay delibera riba e alternativanan, kico lo pasa despues y si e abogadonan duna e señal si nan por sali di e contract si of no.
