Prome Minister, Evelyn Wever-Croes a declara na e matutino aki cu nan a hiba un debate intenso, hunto cu expertonan di epidemiologia, y nan a haci un analisis y calculacion riba e forma con Aruba lo habri su frontera cu Merca.

E prioridad ta evita cu e bishitantenan di Merca por yega Aruba mes cu e chens cu ta positivo pa e malesa. Specialmente mirando di ki parti nan ta bini. A base di ultimo decision, nos autoridadnan local lo haya sa si e bishitantenan ta bin for di estadonan di halto riesgo of no. Si e ta bin di un estado di halto riesgo, miho e test ta wordo haci den nan pais mes, prome cu nan ta subi avion pa bin Aruba.

E ultimo casonan importa di e virus tin di haci cu un persona cu a bin abordo di un vuelo di Peru y Ecuador, unda e indice di Covid ta halto. Otro persona a bin di Florida, unda ta registra cantidad di caso di e virus. Y otro dos persona ta di Colombia, cu nan casonan ta keda subi keto bay.

Ya caba prome cu bo ta biaha ta wordo exigi un test na entrada, pa filtra eventual caso di Covid pa no drenta nos pais. Logicamente si bo ta positivo bo ta abstene di biaha. Esunnan cu ta haci nan test na momento di yega Aruba, y nan ta resulta positivo, nan ta tuma medida di biaha y isola e persona mesora. Manera a yega di sucede cu e ultimo caso positivo, el a bisa. E tipo di medida aki ta yuda pa evita cu e virus por plama mucho lihe. “Riesgo nos ta keda core, pero loke nos tin cu haci ta hopi cauteloso,” e mandatario a bisa.

Encuanto e estado di halto riesgo, e mester ta di hendenan cu ta biba den e estado ey mes. Pasobra e ta haya cu New York ta bayendo ‘hopi bon.’ Nan tin cifra casi igual cu Hulanda, y mayoria di nos turista ta bin di e area ey. Ademas nan ta weita cu mayoria di nos turistanan ta bin di areanan cu tin e contagio di e virus basta domina. Manera gobierno a yega di informa, e turistanan cu ta bin di estado di basta riesgo ta yena e ED card y e tin basta condicion. E ta un procedura cu nan a introduci, y cu nos tur tin cu cumpli cune. E ta tipo un formulario cu un serie di data, entre otro unda e persona ta biba.

El a splica na placa chikito cu si e persona ta biba por ehempel na New York, e por subi avion sin haci e test, pero na Aruba nan ta haci e test. Pero si ta e caso di un persona cu ta biba na Florida y ta dicidi di uza New York como trampolin pa bin Aruba, a base di informacion di ED solamente nan por subi avion, si proba cu tin un test negativo haci na Merca mes denter di 3 dia so.

El a laga sa cu hopi di nan no por haci e test, pasobra na Merca e estadonan cu tin halto contagio awor, bo no ta haya e test pa haci lihe. E situacion aki ta haci cu mucho hende no por bin di e estadonan aki. El a declara cu na Aruba nos sistema si ta funciona. El a cita e pasaheronan cu a yega for di KLM diadomingo ultimo. Nan a haci e test y dialuna mes mainta a haya e resultado.

Gobierno ta haya mas safe pa e bishitantenan test na Merca mes prome cu nan ta bin Aruba. Asina ta evita cu e virus por drenta Aruba. Pasobra ayanan nan ta constata si nan ta positivo pa e virus, y si ta asina nan no ta subi avion mes. Mientras cu na Aruba nos ta test esunnan cu ta bin di area di menos riesgo. Si un persona ta resulta positivo, tin protocol pa atende cune y tur cos ta regla. E prome mandatario ta sigur cu esey tambe ta bay bon.