Publicacion di un carta, aparentemente firma pa Secretario Interino di Conseho di Ministro di Aruba, sra. Geraldine Blom-Ras, a causa confusion, ya cu recientemente Prome Minister despues di su regreso di exterior a declara den conferencia di prensa cu no tin un decision oficial riba e peticion di Aruba Airlines pa habri frontera cu Venezuela pa facilita vuelo di transito for di Venezuela pa Merca, haciendo escala na Aruba.
E tema aki a causa bastante discusion, tanto pro como contra, dependiendo di e aspecto den debate. Di banda di e aerolinea ta argumenta cu tin alrededor di 200 cupo di trabao na riesgo, di cual un gran parti lo ta di hende local, si e compania para tur operacion. Mientras tanto e compania mes a anuncia caba cu e vuelonan entre e islanan ta continua, mientras cu ta pendiente ainda di un decision encuanto e conexion entre Aruba y Venezuela.
Di otro banda ta trece dilanti e peligronan pa trece hende Aruba, cu unabes nan ta aki, lo por pidi asilo como refugiado, hasta den caso cu nan firma un ‘waiver’ prome cu inicia vuelo na Venezuela. For di declaracion di Prome Minister mes por conclui cu ainda no tin un decision riba e asunto aki y por lo tanto no tin un decision tampoco. Riba pregunta di prensa el a declara cu e no ta na altura di ningun carta cu lo a bay pa e compania di aviacion, y cu e lo bay averigua esaki.
Nota di redaccion
A tuma nota di e carta divulga den prensa na Aruba, unda por observa varios deficiencia compara cu un carta normal.
E carta no tin fecha, no ta menciona na ken e ta dirigi, no tin number di archivo (kenmerk) y ademas lo ta sumamente straño cu un Secretario Interino di Conseho di Ministro ta informa di e manera aki di un asunto cu normalmente lo ta sali di despacho di e ministro concerni. Tambe cu e carta no ta menciona vuelo riba Venezuela. Nos ta keda pendiente pa un debido splicacion di Prome Minister y no lo conclui nada sin haya sa e status berdadero di e carta aki.
Potret di 24ora.com
