Gobierno di Aruba ta ofrece na e momentonan aki un conferencia di prensa dos biaha pa dia pa actualisa comunidad tocante e virus COVID-19. Durante esun di diamars anochi, nan a trece dilanti cu tur residente cu lo ta yega na Aruba ta haya un carta y cu nan mester bay den cuarentena pa 14 dia.
Tocante esaki, minister presidente Evelyn Wever-Croes a menciona cu e persona ta haya un instruccion cu mester yena pa sigui tur indicacion. El a recorda cu esaki ta un instruccion y no un peticion, cu mester bay den cuarentena, cu ta pa e bienestar mes di e persona y pa esunnan cu ta rond di dje.
Esaki ta nifica cu e persona mester isola su mes den cas, no ta ricibi bishita, ni sali pa ningun motibo. Hasta si na momento cu e persona ta baha for di avion no tin ningun sintoma, aworaki e exigencia di instruccion di cuarentena ta conta pa tur hende cu ta drenta Aruba.
Di otro banda, Bon Dia Aruba a haci un pregunta tocante e cantidad di suficiente enfermero den hospital tratando e situacion aki. Wever-Croes a trece dilanti cu nan ta conta cu e cantidad suficiente di personal, como tambe di ekiponan, basa riba e poblacion.
Pa e motibo aki, el a haci un yamado pa e poblacion: “Nos no tin 110.000 ekipo ni cama, ni dokter den hospital. Nos tin un capacidad di cama limita y basa riba loke un pais mester y pa atende e grupo cu ta relativamente chikito cu ta e personanan cu ta bira malo”, el a manifesta.
Pa finalisa, el a señala cu no tin motibo pa bay den panico. Aruba ta maneha e crisis hopi bon. Tampoco ta berdad cu supermercadonan y botica ta bay cera. “Si nos mester yega na e punto cu nos mester pone un shut down pasobra comunidad no a cambia di comportamento, asina mes ainda supermercadonan mester keda habri pa cumpra cuminda”.
