Manera conoci, e dia di ayera Minister Otmar Oduber a retira oficialmente di su carera como politico y di su funcion como Minister di Infrastructura, Medio Ambiente y Desaroyo Teritorial. Prome Minister Evelyn Wever- Croes a ofrece un palabra na medionan local cu tabata den e sala di conferencia di Bestuurskantoor.

Minister Presidente a expresa den nomber di Gobierno di Aruba cu esaki no ta un momento facil, pero di mesun manera, el a afirma cu cada persona como politico na e momento cu ta drenta den politica tin cu tene na cuenta cu ta yega un dia asina y Oduber ta den bon hunto cu su famia y sostenedonan pa por yega na e momento aki.

El a recorda cu na e momento cu nan a drenta den gobierno, Wever-Croes a bisa cu e no por considera Oduber manera un amigo, pa motibo cu nan tabata contrincante politico y sinembargo loke nan a scucha tabata e deseo di e comunidad, e deseo di pueblo expresa den eleccion 2017, cu pueblo kier un cambio y kier un coalicion.

“Sinembargo, diferencia di opinion semper ta keda, pero ta importante ta pa no enfoca riba kico ta dividi bo, sino loke ta uni bo y asina nos a crea e coalicion aki”, Wever-Croes a sigura.

Na mesun tempo, el a expresa cu e pais ta pasando den hopi presion y hopi tension, pero ta importante pa keda cu locual ta uni nan en bes di lo cual ta dividi y naturalmente e gobierno ta keda solido, hopi stabiel y Oduber t’ey ainda pa algun luna. Despues nan ta yama bonbini pa Marisol Lopez-Tromp, kende no ta un desconoci riba e materia y trabou ta continua.

Ademas, Wever-Croes a manifesta cu e ta respeta e decision di Oduber, cu ta un decision grandi y hopi dificil. Tambe el a gradici e pa e forma con el a yega, e tabata manera un motor tras di gobierno y esey ta algo cu ‘nos lo haya su falta y nos no tin ni un duda cu e trabounan lo wordo ehecuta door di Marisol y e team cu ta keda atras’, el a afirma.

Di otro banda, Wever-Croes a sigura cu ‘no tin problema den gobernacion y p’esey nos tur ta akinan hunto cu hopi presion, tambe tin persona cu hopi deseo pa e gobierno aki no logra, pero mi tin un noticia pa boso, nos ta logra pasobra nos kier Aruba na prome luga”.