Aruba ta preparando pa e yegada di dia 1 di juli, momento oficial pa e re-apertura di su frontera, asina minister presidente Evelyn Wever-Croes a duna di conoce durante un conferencia di prensa.

Paisnan como Canada, Hulanda y otronan di Europa, como otro di Caribe por cuminsa bin Aruba di un manera gradual, pa manera minister presidente a sigura, por haci tur e test di un manera trankilo. E turistanan lo haya un Aruba hopi diferente na unda e beachnan lo ricibi sin hopi bishitante y asina duna mas espacio pa cuminsa prepara.

El a trece dilanti cu el a tuma nota di cantidad di comentario den comunidad. Un di nan ta bisa cu esaki no ta un miho momento pa habri frontera y cu lo ta miho pa lag’e cera, pa loke el a enfatisa: “Nos no tin niun hustificacion pa no habri y nos no por keda cera,” pa motibo cu economia di Aruba ta depende di reapertura.

Tambe ta existi otro grupo cu ta bisa cu e exigencia cu Aruba a pone pa turistanan ta demasiado halto, cu ta cobra mucho placa pa seguro y pa e prueba. Di esaki, Wever-Croes a bisa cu ta berdad cu gobierno kier habri pa economia, pero e salud di e ser humano, pueblo y turistanan tambe ta keda na prome luga. Pa e motibo aki, el a splica cu e exigencia ta di 100% di testing, kiermen cu tur turista cu ta bin Aruba mester haci su prueba. Algo cu no agradabel, manera e mes a señala, pero ‘e Covid-19 aki no a bin cu un manual’.

Di su parti, CEO di ATA, Ronella Tjin Asjoe-Croes a trece dilanti cu tin rekisitonan vigente pa vuelonan cu lo ta drentando 1 di juli awor. E prome vuelo comercial internacional lo bin for di Hulanda diadomingo 5 di juli, pa loke a elabora riba e proceso di inmigracion online y tambe riba e seguro cu ta rekeri pa biaheronan.

Di esaki, Tjin Asjoe-Croes a informa cu e proceso aki tin algun excepcion. Loke ta parti di e plataforma di migracion online, cu ta un declaracion di salud, no ta aplicabel pa personanan cu ta pertenece na tripulacion di e compania aereo cu ta drentando Aruba. Pa nan tin otro set di protocol vigente. Pero tambe tin cu corda riba otro aerolineanan cu tin nan protocol, locual Aruba ta exigi pa nan presenta tambe y cu ta comparti cu Departamento di Aviacion Civil.

E declaracion di salud cu ta disponibel riba e plataforma aki no mester wordo completa pa esunnan cu lo bay ta den transito, por ehempel, cu no ta drenta Aruba, nan ta pasando via Aruba pa continua cu un biahe.

Otro excepcion ta trata di muchanan bou 15 aña. Tjin Asjoe-Croes a bisa cu esaki ta conforme cu diferente regulacionnan na nivel internacional cu aspecto di riesgo. Tamoco pa esunnan cu ta biaha un par di ora pa Aruba pero no ta keda, esaki tambe ta un categoria cu no mester cumpli cu e rekisito di prueba.

Esunnan como residente di Aruba mester haci e prueba. “Tene bon cuenta cu esaki, nos no ta exclui di e rekisito aki, bishita e plataforma di migracion online prome cu regresa na Aruba y eynan por pone e resultado negativo of e persona tin cu haci su test akinan”, Tijn Asjoe-Croes a declara.

E motibo di esaki ta cu conforme cu diferente splicacionnan cu Departamento Di Salud Publico a trece dilanti, ‘nos como residente tambe ta carga hopi di e riesgo di por pega otro cu e virus’ y ta parti di e maneho actual, el a sigura.

Pa loke ta trata excepcionnan pa seguro, Tjin Asjoe-Croes a comenta cu akinan tambe tripulacion ta wordo exclui, residentenan di Aruba, Corsou y Boneiro, tambe esunnan cu ta biaha cu no ta keda na Aruba y esunnan cu ta den transito, studiantenan di Aruba cu ta studia afo, diplomatico y miembronan di servicio militar muchanan bou 15 aña cu tin otro stipulacion cu ta trata di e pago di 10$ y esey no ta mara na e duracion di e estadia.