Prome minister Evelyn Wever-Croes a expresa durante conferencia di prensa cu no por garantisa e pago di salario pa tur trahado publico pa aki tres luna.
Asina mes, el a sigura cu e problema financiero di e pais ta ‘gigantesco’ e hecho cu berdad gobierno tin un presupuesto aproba pa aña 2020, pero nan no tin e fondonan p’e, pa motibo cu e mercado internacional no ta un mercado facil, y pa via di crisis di COVID-19 a cera e portanan pa diferente pais y esey no ta diferente pa Aruba pa por yega na e fondonan cu nan tin mester.
“E garantia pa aki tres luna pa paga salario, mi no tin”, prome minister a manifesta.
El a afirma cu e garantia cu gobierno por duna ta cu nan ta luchando cu tur esfuerso posibel pa nan por yega cu e placa pa nan por cumpli cu nan debenan awor y den futuro.
Di mesun manera, prome minister a expresa cu ‘nos tur tin cu bay entrega’ y den e proximo dianan gobierno lo splica kico ta e sacrificio cu cada un di empleadonan publico, hefenan di departamento, companianan estatal, trahadonan y directornan di e companianan aki hasta politiconan, parlamentario y ministernan kico lo wordo espera di cada un di nan pa duna como sacrificio y asina nan lo haya e placa nan por garantisa cu nan por paga e salario di e tres luna cu ta bin.
