Prome Minister Evelyn Wever-Croes (MEP) a papia di e Conseho di Grandinan, cu ta un instancia, un instituto cu lo traha pa gobierno haya constantemente informacion riba tema cu ta trata nos ciudadanonan di edad avansa.
E mandatario a splica cu persona trahando den e instancia no ta pensionado, pero hende cu tin atencion riba e tema. E instituto lo ta uno pa cuido di salud y cuido en general, manera con e casnan ta ser cuida, e yudansa cu famia mester, e tipo di cuido.
E aspecto financiero, cu unabes nan baha cu pensioen, entrada ta bay atras. Wever-Croes a splica tocante e prima AZV y tarifa di belasting pa logra soluciona. “Nos ta na caminda pa duna alivio, pero ta algo cu e ouderenraad lo duna gobierno conseho.”
Pa locual ta trata infrastructura y accesibilidad pa grandinan, sea den edificio di gobierno, den banco of riba caya, el a bisa cu esey tambe lo ta pa esunnan cu algun deficiencia of limitacion, pa nan tambe por tin e comodidad den infrastrucutra.
E mandatario a splica cu Conseho di Grandinan a bay den combersacion cu OPPA, cu a traha e concepto. “E idea ta similar na SER, Social Economische Raad. Un grupo di persona cu ta wordo apunta door di sector priva y sector publico.” SER ta duna gobierno conseho riba temanan social y economico, por ehempel, e tema di aumento di salario minimo; semper mester bay via SER.
Pa finalisa, e mandatario a aclara cu Ouderenraad no lo cay bou di SER, pero ta algo similar cu tin nan mesun secretariado, cu lo yuda gobierno structura ‘interes di nos grandinan, tur decision cu wordo tuma ta trahando riba dje’.
