Entrante 15 di maart 2023, Departamento di Relacion Exterior/Directie Buitenlandse Betrekkingen (DBB) Aruba, a conoce un Directora nobo den persona di Sra. Jocelyne M.M. Croes. E ta e prome ser femenino pa desplega e funcion aki y ta sigui Sr. Edwin Abath cu a bai cu pensioen aña pasa.

E proceso pa nombra un directora nobo pa DBB, a inicia aña pasa. Mas di 20 persona a aplica pa e funcion aki y Sra. Croes tabata cumpli cu tur e rekisitonan necesario y mas, pa por desplega e funcion aki.

 

Sra. Croes, tin un trayectoria amplio y largo den gobierno, den ramo internacional, y mundo diplomatico, cu un enfoke den cooperacion entre pais y organisacionnan internacional.

 

Desde 2002, sra. Croes a traha den varios funcion den gobierno di Aruba, y a fungi como Minister Plenipotenciario pa Aruba na Merca entre januari 2008 y augustus 2014. Prome cu el a cuminsa traha pa gobierno di Aruba, Sra. Croes a traha entre otro pa e organisacion di Nacionnan Uni na New York, Africa y Azia. Sra. Croes a studia Politicologia y Relacion Internacional na Merca, Francia y Hulanda.

Manera conoci, Aruba ta un pais cu un orientacion internacional. COVID a mustra di un forma nunca antes bisto con nos mundo ta interconecta y alabes con Aruba por optimalisa solucionnan, y ta resiliente via relacion internacional na momento di desafionan grandi asina.

 

Den e caudro aki, DBB ta hunga un papel hopi importante, y un cu lo sigui aumenta di importancia den e añananan nos dilanti, considerando e desaroyonan na nivel mundial.

DBB ta desplega un rol clave tambe pa locual ta regarda cooperacion den Reino, relacion entre diferente paisnan y organisacionnan internacional. P’esey ta importante pa tin un director cu tin experiencia amplio y conocemento relevante di e prioridadnan pa cu e cartera internacional y desaroyonan di pais Aruba. Alabes ta importante pa e persona cu ta encarga cu e tarea di director/a tin un bon network na nivel local, internacional y ta altanto di e ultimo desaroyonan na nivel global, pa Aruba keda activo y amplia su rol na nivel internacional.

Sra. Jocelyne M.M Croes

Relaciona cu su nombramento Sra. Croes a expresa: “Den e funcion di Directora di DBB, mi ta desea pa sigui pone na disposicion mi experiencia, conocemento y habilidadnan. Cu mi netwerk extenso di decadas, den funcionnan similar, lo mi percura pa sigui crea oportunidadnan y yega na resultadonan concreto pa Aruba. Mi ta disfruta di traha pa mi pais y den mi cargo nobo como directora di DBB, lo sigui haci esaki cu e conviccion cu mi conocemento y netwerk amplio lo facilita e tarea mi dilanti pa keda sostene Aruba y su desaroyo”

 

Den su trayectorio como profesional sra. Croes a traha riba temanan di seguridad, desarmamento, igualdad di genero, enseñanza, energia, desaroyo economico y financiero, desaroyo social y sostenibel. El a percura pa crea oportunidadnan pa pais Aruba, a representa gobierno di Aruba na nivel internacional, a negocia acuerdonan y tratadonan internacional y ta conoci di ta pro-activo y pa “get things done”.

 

Sra. Croes a keda mantene su mes hopi activo na nivel internacional, locual ta refleha den su miembresia recien den e Conseho Global di Parnership (SDIG17) di OECD y gobierno di UAE, y di Asociacion di Nacionnan Uni pa Region Caribense, pa por logra e metanan mundial den desaroyo sostenibel di un forma coherente y efectivo.

Considerando Sra. Croes su experiencia y conocemento amplio, nos tin tur e confiansa cu Sra. Croes lo desplega un bon trabao. Prome Minister di Aruba ta desea Sra. Croes hopi exito den su funcion nobo.